SHILLONG: Adhoc skulrango skigiparangna sorkarini bariatgipa dormahana skigiparang kusi ong·tokjaengoba, antigimikna Shillong aro Tura-o skigiparangni jingjengataniko Mongolbar sal dipet Federation of All School Teachers of Meghalaya (FASTOM) dontongatpilna tik ka·angaha.
Mongolbar salo, jingjengatenggipa skigiparangna aganprakangengon, skigiparang an·tangtangni nangnikaniko man·jahaoba ian jingjengatanio bak ra·gipa skigipa sakantini cheanian ong·aha ine FASTOM-ni spokesperson Mayborn Lyngdoh, jingjengatenggipa skigiparang re·angpile kamtangtangko ka·china didiataha.
Mongolbar pringo FASTOM-ni central executive committee (CEC) tom·enba, adhoc skigiparangni dormahako bariatna gita sorkarini tik ka·ani bidingo chanchirimangon, sorkarini bariatgipa dormahana suk ong·gijaniko paraktokaha indiba maming chol dongjae skigiparangni jingjengataniko dontongchengna tik ka·angaha ineba Lyngdoh parakataha.
Adhoc skigiparangni dormahako bilsio 5 percent ka·e bariatchina gita FASTOM, sorkario dabiangkugen ineba FASTOM-ni dilgipa, skigiparangna ku·rachakaniko on·ataha.
Skigiparangni antigimikna jingjengataniara, an·tangtangni dormaharangko bariatchina dabie jingjengatanisan ong·ja indiba a·doko lekka porani gadangko dingtangatna nangnike ja·ku de·aniba ong·aha ineba Lyngdoh aganaha.
Skigiparangko sorkari skigiparang, sorkarini dakchakgipa skigiparang aro private skigiparang dake bak gittamosan donaichina gita sorkariko didianggen ineba FASTOM-ni spokesperson parakataha.
Meghalaya a·dokni adhoc skulrango skigiparangna gong 18,000-chi dormahako bariatan baksana bilsio 5 percent ka·e bariatchina aro adhoc skulrangko deficit-ni gadangona ra·dochina dabie, re·anggipa antini Mongolbar salonin skigiparang, Shillong aro Tura-o tukampile jingjengatangahachim ine nikna man·a.
Sombar salo a·dokni Cabinet tom·e chanchirimangenba, adhoc skulrango skigiparangni dormahako bariatna tik ka·e donangahachim indiba sorkarini bariataniko skigiparang chu·ongnikskakujaengachim.
