WILLIAMNAGAR: Re·anggipa Mongolbar salo, East Garo Hills a·jani police-rang, dingtangmancha Williamnagar-ni wilwilao donggipa dingtang dingtang village defence party (VDP)-rang baksa tom·aniko Williamnagar Police Station-o ong·atangaha aro ia tom·anio East Garo Hills a·jani Deputy SP Hq, Dy SP DSB, Williamnagar police station-ni officer-rang aro dingtang dingtang VDP-ni membor-rang bakko ra·angtokaha.
Ia tom·anio VDP-rangni dakna nanggni kamrangni gimin dingtang dingtang police officer-rang agan-talate on·angengon, songtangtango aro gittimtangtango ong·gija dakgipa kamrangko champengna man·na gita mikrake kamko ka·china aro ong·gija dakgipa kamrangni bidingo ta·raken police-rangna kobor on·china didiangtokaha.
Songtangtango aro gittimtangtango nirok sandianirangko dakengon, niamrangko jaktango ra·jachina aro maiba ong·gija dakgipa kamrangko rim·a man·genchimode police-rangna kobor on·skachina gitaba ia tom·anio VDP-ni membor-rangko didiangaha.
VDP-rangni neng·nikanirangkoba ia tom·anio police-rang knatime ra·angaha.
