SHILLONG: Re·baenggipa July 18 tariko ong·atenggipa Presidential election-o National Democratic Alliance (NDA)-ni candidate ong·e susaenggipa Draupadi Murmu, dingtang dingtang political dolni dilgiparangko gronge an·tangna chakpaaniko on·china didina gita Budbar salo, Meghalaya a·dokni skotong Shillong songjinmaona re·baaha.
Murmu-ko Meghalaya a·dokni Chief Minister Conrad Sangma, Assembly-ni Speaker Metbah Lyngdoh aro BJP-ni dilgiparang, Budbar pringo, Umroi Airport-o rimchaksoaha.
Murmu baksana Union Ports, Shipping & Waterways Minister Sarbananda Sonowal, Shillong-ona re·bapaaha.
Shillong-ona sokbaani ja·man NDA-ni candidate, dingtang dingtang political dolni dilgiparangko Umiam-o donggipa Orchid Lake Resort-o gronge agangrikaha aro ia tom·anio All India Trinamool Congress (AITC)-ni MLA HM Shangpliang-ba dongpae bakko ra·angaha.
Congress doloniko ra·gala man·gipa sakbonga MLA-rangde internet gita bakko ra·angskaaha.
NDA-ni candidate Draupadi Murmu-ara Tribal me·chik candidate ong·a inenba Meghalaya Democratic Alliance (MDA)-o bakrimenggipa jolni dingtang dingtang political dolrangde una chakpaaniko paraktokahachim ine nikna man·a.
Iana skang, Draupadi Murmu-na a·dokni Chief Minister Conrad Sangma, rimchaksoani kattarangko parakatengon, “Presidential election-o NDA-ni candidate ong·e susaenggipa Draupadi Murmu-ni skanggipa changna Meghalaya a·dokona re·baanio chinga uko rimchaksona kusi ong·bea. Tribal-rang ong·e Murmu-ko da·alo an·ching baksa ong·ahani gimin anga dingtangmancha mittelna ska,” ine Social Media-o parakataha.