TURA: Tura-ni Araimile junction ba bibrako ‘one way’ dake watengani a·sel Dakopgre aro New Tura-chipakchi re·angenggipa garirang apchangket ong·na gita nangrongenga ine kobor on·timgiparang u·iataha.
Kobor on·timgiparangni u·iatani gitade, ia ramako skangode Dakopgre-rangoni re·bagenchimoba minute 15 ba minute 20-rangni gisepon Hawakhana jolrangona sokaiachim indiba ia Araimile bibra gita ‘one way’ dakatani ja·man da·o kilometre 6 ba 7 ong·gipa ramakon kontasarang bate nangskaengahachim.
“ Ia ramako ‘one way’ dakatani ja·man chinga batesa neng·nikanirangko man·skana nangtokengaha maina skangde office ba skulni somoirangoba iandake garirangni apchangketanirangko nikna man·jachim indiba da·ode batesa obostarang namjabatsrangengaha. Maiba a·sel ong·ana ba nanggitikan somoirango re·rurana nanggipa manderangde mai dake somoi gita sokna man·gen?” ine Tura-o songdongenggipa manderangoni saksa parakataha.
Kobor on·timgiparangni u·iatani gitade, Dakopgre-oni Araimile-ona dakbagipa ramao badiaba bakrangode chugipa ramarangko aro rama namgijagiparangkoba re·na nanga aro da·o gita garirang apchangket ong·ani somoirangode manderang re·a doanirango bate neng·nikanirangko chagrongna nangtokengachim.
Iandakgipa obostarangko mikkangchi chagrongna nangkuaigenchimode jolo songdongenggipa manderang, West Garo Hills a·jani Deputy Commissioner-na sedoatgen ineba kobor on·timgiparang parakataha.
Iani bidingo West Garo Hills a·jani Superintendent of Police (SP)-ni talatanina sing·sandiaton da·o dipet maming aganchakanirangko man·skakujaengachim.
