TURA: South Garo Hills a·jani Sibbari primary health centre (PHC)-ko namdapatanirang dongjaengani a·sel sagipa ding·gipa aro PHC-o kam ka·enggipa manderangsan ong·aigija songo noko donggipa pilak manderangan neng·nikanirangko chagrongna nangtokenga ine Sibbari-ni dingtang dingtang NGO-rang, chong·motan GSU, FKJGP aro ADE dolrang parakatenba, jolni namgnina ia PHC-ko namdapatchina sorkariko didiataha.
Iani bidingo dolgittam NGO-rang, Budbar salo dingtangmancha jingjengatanirangkoba dakangaha.
NGO-rangni dabienggipa dingtang dingtang nanganirangara, Sibbari PHC-o birth certficate-ko on·china, PHC-ni dingtang dingtang nokrangko taridape on·china, PHC-o kam ka·enggiparangna chu·onga gita quarter-rangko rike on·china, PHC-ni toilet-rangko taridape on·china, PHC-na ambulance-rangko chu·onga gita on·china, PHC-o kam ka·giparangko chu·onga gita rakkichina, medical officer saksako rakkidapchina, sweeper ba rongtalatgipa saksako rakkidapchina aro Gasuapara-na dingtang PHC-ko on·china dabianirangan ong·achim.
Iani bidingo dolgittam NGO-rang, a·dokni Health & Family Welfare Minister-na Sibbari PHC-ni medical officer gita chittiko sedoataha.