RESUBELPARA: Adita salrangna skang, Dainadubi-ni me·chik saksako Dudhnoi police station-o Assam police-rangni kragija dake doka satahani gimin Garo Hills-ni dingtang dingtang NGO-rang jegalgrimtokenba dos dakgipa police-rangna rakbatgipa sastirangko on·china dabiangtokaha.
Re·anggipa July-ni 4 tariko, Dainadubi-oni Mousumi Momin minggipa me·chik aro uni segipa Sengkal Marak-ko Dudhnoi police station-ona okamatani ja·man, ia me·chikko Dudhnoi police station-ni sub-inspector Bishnu Bahadur Newar aro koela badinggipa Dhrubananda Chowdhary-ni ge·etaniko man·e, Mamta Joshi minggipa me·chik police officer, kragija dake dokahachim. Dokako man·ani a·sel ia me·chikni be·en gimikon mata bu·anirangko man·e da·o tuna aro asongnarangan man·jaenga ine koborko on·ahachim.
Indake ong·engon, me·chik saksa jean skigipani kamko ka·enggipaba ong·achim, uko kragija dake bading chiwalgiparangni ge·etaniko man·e doka satahani Garo Hills-ni dingtang dingtang NGO-rang, Assam police-ni kamko raken jegalataha.
“Ching songni me·chik aro skigipako kragija dake doka satahani gimin chinga Assam police-ko raken jegalenga. Ia me·chikko doka satanio jak donggipa police gimikkon chu·gimik kamoniko ra·galsrangna nanga. Kam dontongatmangmangaianikode chinga nangnikjaenga. Mikkangchi iandakgipa a·selrang ong·taijana gita Assam sorkari rakgipa ja·kuko de·angchina,” ine AHAM-ni president Nirmal Sangma parakataha.
Ia me·chikko kragija dake dokahani gimin Assam police-ni kosako jegalgrimna gita Budbar salo dingtangmancha Dainadubi-o jinma tom·aniko ong·atangaha aro ia tom·anio dingtang dingtang dolrang aro songni bang·bea manderangba bakko ra·angtokaha.
Ia tom·anio songsalna kamko ka·enggipa Jaynie Sangma-ba jinmana aganprakengon, iandakgipa a·selrangara Meghalaya aro Assam a·dokosan ong·aigija India a·song gimikon ong·enga maina police-rang, manderangko dakchakani pal batesa sinjetaniko on·na jotton ka·enga ine parakataha.
Ia tom·anio GSU Northern Zone-ni general secretary Walseng Sangma-ba aganprakatengon, iandakgipa a·selko pilakan jegalgrimna nanga aro ia me·chikko dokanio jak donggipa police-rangni kosako rakbatgipa sastirangko on·na nanga ine parakataha.
Ia me·chikko Assam police-rangni kragija dake dokahani gimin Garoland State Movement Committee (GSMC) Pedaldoba regional unit-ba raken jegalataha aro dos donggipa police-rangni kosakoa rakgipa ja·kurangko de·china dabiataha.
