TURA: Garo Hills-o gari cha·uanirang batroroengani gimin police-rang, bilakbate am·sandianirangko dakon, batanggimin salbrini gisepo bol 45 cha·ugimin bike-rangko aro sak 17 gari cha·ugipa manderangko rim·na man·aha ine kobor on·aha.
West Garo Hills a·jani Superintendent of Police (SP) VS Rathore-ni u·iatani gitade, Garo Hills-o gari cha·uanirang batroroengani gimin batanggimin bilsi 5-ni gisepo gari cha·uani bidingo segatgimin case-rangko am·sandina gita July-ni 4 tariko Special Investigation Team (SIT)-ko songaha aro uandaken SIT-ni official-rang, bilake am·sandianirangko dakenba salbrini gisepon bol 45 cha·ugimin bike-rang baksana sak 17 gari cha·ugipa manderangkoba rim·na man·aha.
Ia bol 45 bike-rangoni bol 11-ko Rajabala joloniko, bol 12-ko Jengjal joloniko, bol 2-ko Tura-oniko, bol 7-ko Bongaigaon-oniko aro bol 13 bike-rangko Dadenggre joloniko man·aha ineba SP u·iataha.
Rim·ako man·gipa sak 17 manderangoni sak 15-kode Meghalaya a·dokoniko aro sak 2-kode Assam-oniko rim·skana man·aha ineba u·iataha.
“Rim·a man·gipa manderangoniko chinga ge 17 mobile phone-rang baksana ma·manti lekkarangkoba man·aha aro ia mobile phone-rang aro lekkarangoniko chingni ma·sina man·ani gitade, Assam aro Meghalaya a·dokni bang·bata a·jarangon gari gorarangko cha·ue palgrikenga. Assam-oniko cha·ugipa garirangko Meghalaya-ona palatskaenga aro Meghalaya-oniko cha·ugipa garirangko Assam-ona palatskaenga. Ia bike-rangko aro manderangko rim·anichi chinga matchotgija dongenggipa ming 10 case-rangko matchotatna man·aha,” ine Rathore parakataha.
Mikkangchi maming neng·nikanirangko man·jana gita garirangko palengon ba breskaengon, SP office-oniko Police Clearance certificate-ko ra·chengchina gitaba West Garo Hills a·jani SP u·iataha.
Indake ong·engon, mikkangchiba niam gri aro cha·ue palenggipa garirangko police-rang am·sandiangkugen aro cha·ugimin garirangko aro cha·ugipa manderangkoba rim·na ka·dongengkua ine Rathore parakataha.
Garo Hills-o bol 45 cha·ugimin bike-rang baksana sak 17 manderangko rim·a
Date:
Share post:
