SHILLONG: Meghalaya a·doko drugs ba pekatgipa sam badinganiko champengna police-rang rakbee kamrangko ka·engon, East Jaintia Hills a·jani police-rang, Bristibar salo Silchar-oni Shillong-ona re·baenggipa gari bolsako rim·enba, ia garioniko heroin samrang baksana mande sakgniko rim·na man·aha.
Koborko on·ani gitade, Silchar-oni pekatgipa samrangko ra·e Shillong-ona re·angenga ine koborko man·soenba, East Jaintia Hills a·jani police-rang, WB 02P 2867 Maruti Zen gariko Umtrya CP-o rim·sona man·aha aro ia garioniko sandion, ge 6 baksorangko chipe ra·baenggipa gram 72 heroin samrang baksana strip 17 Nitrazapam tablet-rangko man·aha.
Ia samrangko man·ani ja·man police-rang, ia gario re·baenggipa mande sakgnikoba rim·aha.
Iani bidingo police-rang, Khliehriat police station-o mokordoma ka·e, am·sandianirangko dakengkua ineba kobor on·aha.
