SHILLONG: Meghalaya a·dokni badiaba badiaba biaprango District Council-rangni niam gri chalaienggipa check gate-rangko nikna man·engkua ine Bristibar salo, Khasi Hills Autonomous District Council (KHADC)-ni Congress dol, United Democratic Party (UDP)-ni dilenggipa KHADC-ni Executive Committee-ko matnangataha.
KHADC-ni Summer Session-ko ong·atanio Mylliem-ni Congress MDC Ronnie V Lyngdoh, iani bidingo chanchirimaniko dakdilangengon, East Khasi Hills a·jani Lad Mawreng-o ua iandake district council-ni niam gri chalaienggipa check gate-ko nikna man·aha ine parakataha.
Ia check gate-ko Roads, Transport & Highways Ministry-ni ra·chakani grisa kuliaha ineba Lyngdoh parakataha.
National Highway-rango iandakgipa district council-ni check gate-rang bang·en dongkuenggen ineba Congress MDC aganaha.
“Iandakgipa check gate-rangko chalaina on·aniara district council-rangoba niam gri kam ka·anirangko mesokani gita ong·enga,” ine ua aganaha.
Uni iandake matnanganina KHADC-ni CEM Titosstarwell Chyne aganchakaniko on·angengon, national highway-rango check gate-rangko, patrolling post-rangko aro beat house-rangko kulina gita da·o dipet council, nangchakegipa ministry-oniko permission ra·a dongkuja ine parakatskaaha.
“United Khasi Jaintia Management of Forest Act 1958 aro iani ning·o ra·gatgipa dingtang dingtang niamrango pangchakesa beat house-rangko, check gate-rangko aro patrolling office-rangko district council kuliaha,” ine Chyne aganaha.
Meghalaya a·doko niam gri bol den·aniko champengna gita Supreme Court, 1996 bilsini December jaon dingtangmancha hukumko on·aha ine talatangengon, iani giminsa a·doko niam gri bol den·anirangko champengna gita district council, beat office-rangko, check gate-rangko aro patrolling office-rangko donna nangnikaha ine KHADC-ni CEM parakataha.
Badia biaprango check gate-rangko, patrolling post-rangko aro beat office-rangko donna nangengachim, uandakgipa biaprangko district council segatenba, a·dok sorkarina on·atgen ineba Chyne parakataha.