RESUBELPARA: Meghalaya sorkarini ra·gatgipa ‘Skills Meghalaya’-ni ning·o jolni manderangna, gue bikaponiko plate aro uandakgipa ma·manti bosturangko tarina skie on·na Meghalaya State Skill Development Society-ni gita training program-ko re·anggipa Budbar salo, North Garo Hills a·jani Mendipathar Multi-Purpose Cooperative Society-o a·bachengate on·angaha.
Ia training program-ko a·bachengatanio North Garo Hills a·jani Additional Deputy Commissioner (ADC) ZJ Sangma, mongsonggipa sokgipa ong·e jinmana aganprakangengon, gue bikaprangko songni nokni wilwilaon altuae man·na ama aro ia gue bikaprangoniko manderang, ma·manti bosturangko tarienba pale sim·e cha·skana man·ani gimin ia training program-ko ong·ataniara jolni manderangna janggi tangani cholrangko on·na dakchakani ong·gen ine parakangaha.
Ia training program-o skie ra·enggipa sakantikon ua gisiko nange skie ra·china aro an·tangtangna janggi tangani cholrangko dake ra·china gitaba Sangma didiangaha.
Ia training program-ko ong·atani bidingo North Garo Hills a·jani Skill Development Officer, jinmana talate on·angskaengon, a·doko songdongenggipa manderangni janggi tangani gadangko tang·doatna aro bading chiwalani kamrangko namdapatna gita a·dok sorkari, dingtangmancha Meghalaya State Skill Development Society-ni nirokanio ‘Skills Meghalaya’-ko ra·gataha aro ia program-o pangchakesa ia training program-ko ong·atenga ine parakangaha.
Ia jagnini gisepo minggittam jakni kamrangni gimin, chong·motan gue bikaponiko plate-rangko tariani, bolrangoniko sol·a repani aro wa·aoniko wata chengani kamrangko sak 60 manderangna Mendipathar Multi-Purpose Cooperative Society, skie on·anggen ineba officer parakataha.
