Scheme-rangko galchipa, matchotna man·jani gimin Mukul, Conrad sorkariko sing·doa

Tura: Gitcham Chief Minister aro da·o ong·enggipa Opposition dilgipa Mukul Sangma, Conrad Sangma-ni dilenggipa sorkariko maini gimin sanction ka·gimin project-rangko da·onaba matchotna man·jaenga ine sing·ataha.
“Bang·a jolni contractor-rang angona re·bae, uamangni bill-rangko da·onaba man·kujaengani gimin suk ong·gijaniko parakaha, indiba gipin a·dokni contractor-rangkode pangnan namgniko dakronga. Chonchongipa ba ramramgipa computer ba dingtang dingtang dakgipa bosturang (equipment)-ko supply ka·na Delhi-ni manderangna on·a, an·chingni a·doktango iandakgipa bosturangko supply ka·na manderang dongjama? ine Mukul Sangma, Asanang North Tura Block-o aganprakmitingo, ia kattarangko sing·ataha.
Sonibar salo ong·atgipa drive-o sak 600 gapnapile manderang bak biming segataha aro AITC dilgipani ong·atgipa program-o bang·a manderang bak ra·angtokaha.
“Chingni sorkario bang·a scheme-rangko pass ka·aha aro kamrangko a·bachengachim, jekon ia sorkari, galchipaha ba ru·utate donenga. Tura aro Shillong-o ge·gni medical college, ge·gni engineering college, technical college-ko an·chingni gitcham CM Williamson Sangma-ni bimingo donrikna chanchianiko ra·galaha.”
Iarangni gisepon mitam company-rangko mikkang nie kam ka·ani gimin sing·ate, AITC-ni dilgipa, Rongram-Phulbari rama, jekon da·o rikenga, uni giminba sing·ataha.
“Project chu·gimikni damara kror 132 ong·a indimangba project-ni 30 percent kamkosan matchotanina kror 77 tangkako gamaha. Ia apsan company-an Meghalaya Assembly aro Damra- Bajengdoba ramako rikani project-koba jako ra·aha, company-ni kamko an·ching gimikan mikrontangchi nikna man·enga.”
“Police department-oba hajalni hajal vacancy bangbang ong·e dongenga jekon gapatna gita nangenga. Iarang budgetary allowance-ni bak ong·a. Jekon gapatgija dongenga aro gital vacancy-rangba donga, uarangkoba gapatna nangenga.”
“Uandake Mukul, uni AITC party-ko manderang namnike ra·chaktoka aro unbaksa donga, ine ka·donganiko parakataha. Aro election-ko chena ka·donganikoba parakaha.”
Minggipin Chokpot-ni MLA Lazarus Sangma-ba tom·anio aganprakataon, ‘a·dok sorkarini gimik department-rangon golmal ong·tokenga, educaction-ko skang done kam ka·gen ine ku·rachakaniara baojok? Maini gimin SSA teacher-rang dormahakon man·jaenga? Doctor aro nurse-rangkoba ian skanggipa changna ramao ong·kate jingjengatniko nikna man·aha ine aganataha.
Tom·anio Rangsakona-ni MLA, Zenith Sangma, MDC Rinaldo K Sangma, Agassi R Marak, Nehru Sangma, Lahit Sangma, Sadhiarani Sangma, gitcham MLA Noverfield Marak, gitcham Tura MDC Rupert Sangma aro gipinrangba bak ra·angtokaha.