SGH-ni, Darit Simragittim-ko nigija galchipe donanina, AOSW suk ong·gijaniko parakata

Williamnagar: Ru·uta bilsirangna galchipe donako man·enggipa, Damrit Simragittim songni manderang, dilgiparangni mikgri dake ka·enggipa kamna suk ong·gijaniko parakataha. Damrit Simragittim, South Garo Hills district, Baghmara constituency, Gasuapara Block-ni ningao ga·akgipa song aro MLA, Shri Samuel M. Sangma-ni man·gipa song ong·achim. Koborrangko man·soani gitade, songni me·chikma sagipako sana bana ra·bana gita ramarang dongjaani a·sel, songni nokni manderang saenggipa mandeko chelbegipa rama ong·genchimoba, mande sagipako ripechakanio ra·bana nangaha. ”Hospital-ona gari gorako, Dumnikhura Bazaar-onisa man·a aro ia biap uamangni songoni kilometer 12 mang chela. Sagipa mandeko chilbaengon, uamang bang·a chiringrangko batsotna gita nanga aro wachi kari ong·ani a·sel ramarang namja baksa chirang dala aro ramarango kenbegnigipa jo·ongrang chika baksana ru·atrang chika man·esa miksonggipa biapona sokbana gita man·aha. Sagipa mandeko chelbea ramarangko chile re·baanide ramram katta ong·ja, indiba sagipa namatna uamangni sikani a·sel jedakgipa kamrangkoba ka·na nangaha. Ia obostarangko nike anga suk ong·ja aro jolni MLA, officer-rang aro dilgiparangni songko namroroatna kam ka·na ja·manchakaniko anga name man·chan nika,” ineA·chik Organization for social welfare (AOSW)-ni, Vice President Gripping Marak aganangaha.
”Chonbegpa, Garo Hills aro Meghalaya a·dokni mangsonggipa biaprang, dilgiparangni name kam ka·jaani a·sel namroro silroro aro dalrorona man·gijaniko, ia obostarangchin mesokenga. Meghalaya a·dok bilsi sotbonga gape, Golden jubilee-ko manipilaha, indiba chang 10 MLA ong·giparang, Chief Minister-rang aro chang 10 MP ong·giparangni ku·rachakanirang indin bang·bango bon·angaia. Uamang maiko man·a kraa? dilgiparang uamangni kamrangna suk ong·ama? South Garo Hills-ni manderang aro gipin district-ni manderang uamangni kamrangna kusi ong·aiama? uamangni tolgipa ku·mikchetanirangko nangkuaiama? Tolgipa dilgiparangni kamrang baksan an·ching mikkangchiba janggi tangna kusi ong·aigenma?, ine Gripping Marak, a·doko donggipa  aro dilgiparangko singdoa gnang aganangaha.
”Batgimin bilsirango tole ku·rachakgipa aro an·tangtangni kamrangko name ka·gijagipa dilgiparangni kamrangko chinga rake jegala aro a·jao donggipa manderang gitalgipa songsal aro namgipa dilgiparangko seokna gita nangengaha. Indake, neng·nikani aro chaktogijanirangko, politician-rangni rama gita ong·gija, an·tango sason ka·na bil gnang ine masie kamrangko ka·china manderangko mol·molna sika,” ine manderangko ku·monga gnang, Gripping Marak aganangaha.