TURA: Hallidayganj-oni Rajabala-ona dakanggipa Agia-Medhipara-Phulbari-Tura (AMPT) ramako tariengani gimin ia ram agita dal·dalgipa garirangni re·ruraaniko champengatchengaha ine Dadenggre (Civil) Sub-Division-ni SDO u·iataha.
SDO-ni u·iatani gitade, da·o dipet ia ramako tariengani gimin ia rama gita dal·dalgipa garirang re·ruraengani a·sel ia ramao apchangketanirangko nikna man·enga aro ia ramao garirang apchangket ong·anichi jolni manderang aro ia rama gita re·ruraenggipa manderang neng·nikanirangko chagrongna nangtokenga ine nikahani gimin ia rama gita dal·dalgipa garirang, mongsongbate bostu salgipa truck garirangni re·ruraaniko champengatchengaha.
“Uni gimin jolo songdongenggipa manderangni namgnina aro manderangna nangchongmotgipa bosturangko sokatna man·na gita Rajabala rama bibraoni Singimari bibraona dakanggipa AMT rama gita dal·dalgipa garirangni re·ruraaniko gita u·iataniko on·taikujaskal champengatchengenga,” ine Dadenggre Civil Sub-Division-ni SDO parakataha.