SHILLONG: Dingtang dingtang a·dokrangni gisepo niam gri sona badingenggipa dolni mande sakbongako Meghalaya Police rim·na man·aha ine a·dokni Director General of Police (DGP) LR Bishnoi parakataha.
DGP-ni u·iatani gitade, rim·a man·gipa mande sakbongaoniko police-rang, gram 800-na batgipa sonarang baksana gong lak 27 tangkarangkoba man·aha.
Koborko man·soani ja·mano police-rang, Abu Bakkar minggipa mandeko re·anggipa June 24 tariko Assam-ona re·angengmiting somoio Ri Bhoi a·jao rim·na man·aha aro uni kang·kareo kabitgipa bostuoniko gram 819 ong·gipa sonani biscuit-rangko man·aha ine DGP parakataha.
Ia mandeko rim·e police-rang sing·sandion, una ia sonako Shillong-oni saoba mandesa, Assam-ni Barpeta-ona ra·angchina gita on·atahachim ine ma·sina man·aha ine Bishnoi aganaha.
Rim·a man·gipa Bakkar-ni parake on·ani ja·mano, Meghalaya-ni police-rang, Assam police baksa nangrime, Shah Jahan minggipa mande saksako Barpeta-oniko rim·na man·aha aro uoniko gong lak 27 tangkarangkoba man·aha. Iani ja·mano, sakgipin Siddique Ali minggipa mandekoba Barpeta-oniko rim·na man·aha.
Rim·a man·gipa manderangni parake on·anio pangchake ja·mano dingtangmancha police dolko songenba, Shillong songjinmaoniko am·sandion, Aziz Lyngdoh minggipa mandeko Laban-oniko aro Subali Kharbani minggipa mandeko Mawlai-oniko rim·na man·aha ine DGP parakataha.
Rim·a man·gipa mande sakbongaoniko mobile phone ge 10, ATM card-rang aro tol·e tarigipa ID card-rangko man·aha ine janapatengon, iani bidingo police-rang ning·tubate am·sandianirangko dakengkua ine DGP parakataha.
A·doko niam gri sona badinggipa manderangko rim·na man·ahani gimin a·dokni Chief Minister Conrad K Sangma-ba a·dokni police dolko mittelpilataha.
