SHILLONG: Meghalaya a·doko ra·gala man·gipa sakbonga MLA-rangko Congress dolo rimnappilani katta dongjaha ine Sonibar salo Meghalaya Pradesh Congress Committee (MPCC)-ni president aro Shillong-ni Lok Sabha MP Vincent H Pala parakataha.
“Ra·gala man·gipa MLA-rangni biaprango chinga candidate-rangko seokmanahani gimin ia sakbonga MLA-rangko ra·pilani katta dongjaha,” ine Pala parakataha.
MPCC president-ni parakatani gitade, iandakgipa constituency-rango Congress dol, gital candidate-rangko susaatna tik ka·manaha.
Ra·galako man·gipa sakbonga MLA-rangna da·o Congress dolni do·gako chipahani gimin ia MLA-rang, re·baenggipa 2023 bilsini Assembly election-o gipin dolrangonisa susaskaani cholrang dongaiahachim.
Ra·galako man·gipa sakbonga MLA-rangba Congress dolona re·angpilani katta dongjaha ine parakatskaahachim.
Ia sakbonga MLA-rangni parakatani gitade, uamangko Congress doloniko ra·galahani gimin uamang gipin dolrangoni susaskana gita cholrangko sandiengachim.
Koborko man·soani gitade, ra·galako man·gipa sakbonga MLA-rangoni sakgittamde National People’s Party (NPP)-o napskaani cholrang dongenga aro sakgnide United Democratic Party (UDP)-o napskanaba gnang.
