SHILLONG: Manderangni mikkango kragija dake mesokjachina aro namgipa bewalko rakkichina gita a·dokni Deputy Chief Minister aro Parliamentary Affairs Minister Prestone Tynsong, manderangni seokako man·gipa MLA-rangko didiataha.
Adita salrangna skang, Meghalaya Assembly-ni Speaker Metbah Lyngdoh aro BJP-ni Minister Sanbor Shullai-ni gisepo adita meligrikgijanirangko nikna man·ahani gimin ia kattarangko Parliamentary Affairs Minister aganaha.
Tynsong-ni parakatani gitade, ia obostara Assembly ning·o ong·jaha aro a·palosa ong·ahani gimin iani bidingo ua mamingkoba agandapna nangani katta dongjaha.
“Beben ia obosta Assembly-ni a·palosa ong·aha aro Assembly ning·ode ong·jahani gimin anga mamingkoba aganna nangani dongja indiba MLA-rang pilakan namgipa bewalko mesokna nanga,” ine Parliamentary Affairs Minister aganaha.
Saksa sakgipinni aganengmiting somoio agandapjachina aro saksa sakgipinko mande ra·grikchina gitaba Minister didiataha
“Assembly-oba ong·chong, je biapoba ong·chong, angni aganengmiting somoio angni ka·rimska agandapjachina angaba uamangni aganengmiting somoio aganpana nangani dongja,” ine Tynsong aganaha.
Indake ong·engon, NDA-ni candidate Draupadi Murmu-ara a·songko dilna sienggipa mande ong·ani gimin mande sakantian obostako una u·iatna bil donga ine NCP-ni state president aro Gambegre-ni MLA Saleng Sangma parakatskaaha.
“Kristianrangni gimin, a·doko songdongenggipa manderangni gimin aro a·dokni gimin presidential candidate-na u·iatna gita Speaker-o bil donga,” ine Sangma aganenba, uni iandakgipa kattarangko aganengmiting somoio BJP-ni MLA, gipin kattarangko aganani ong·jachim ine parakataha.