SHILLONG: Meghalaya a·dokni SSA skulrango skigiparangni dabianirangko July 15 tarikni gisepo chu·sokatjagenchimode re·baenggipa July 18 tarik dipet dontonggija jingjengataniko dakna gita Meghalaya SSA Schools Association (MSSASA) ka·mikkenataniko on·angaha.
Ma·mong sorkarini ra·gatgipa SSA scheme-ni ning·o a·dokni sak 12,451 Lower Primary aro Upper Primary skigiparangna dormaharangko bariatchina aro skigiparangni man·na nangkuenggipa jabongani dormahako changsanon matchote on·china gita MSSASA dabiengachim ine nikna man·a.
SSA skulrango skigiparang, re·anggipa February jaonin jabongani dormaharangko man·kujaengani a·sel neng·nikanirangko chagrongna nangtokengahanin gimin adita salrangna skangsan, MSSASA-ni dilgiparang, a·dokni Education Minister Lahkmen Rymbui-ko gronge agangrikangahachim indiba skigiparangni dormaharangko on·ani bidingo aro dormaharangko bariatani bidingo maming ku·rachakanirangko on·na man·jahani gimin skigiparang suk ong·gijaniko parakattokahachim.
Indake ong·engon, re·anggipa June jani 25 tariko SSA skigiparang apsan tom·e chanchirimangenba, July 15 tarikni gisepo uamangni dabianirangko sorkari chu·sokatjagenchimode, jingjengatanirangko dakna tik ka·e donangaha ine MSSASA-ni president Aristotle Rymbai parakataha.
July 18 tarikoni MSSASA, Additional Secretariat sambao donggipa parking lot-o okumu chake jingjengatna manchienga ineba Rymbai parakataha.
