SHILLONG: Adita salrangna skang, Presidential Election-o NDA-ni candidate ong·e susaenggipa Droupadi Murmu-ni Shillong-ona re·baani somoio Meghalaya Pradesh Trinamool Congress (MPTC) MLA-ni uko grongeaniara, election-o una vote-ko on·na miksonge grongea ong·ja indiba una mande ra·aniko mesokna gitasa grongeaha ine MPTC-ni president Charles Pyngrope talataniko on·angaha.
Tribal a·dokona sakoba rimchaksoaniara una vote on·na miksonge rimchaksoenga ong·ja ine talataniko on·angengon, “Presidential candidate-ni re·baanio dongpana ba rimchaksona re·anganiko chingni party darangkoba champenga dongja maina ian Tribal me·chikko mande ra·ani chin gita Tribal a·dokona rimchaksoanisan ong·aia,” ine Pyngrope parakataha.
“Maini gimin chinga uko rim·chaksona man·jawa?” ine sing·doatengon, Presidential election-o opposition dolni candidate Yashwant Sinha-nasa Trinamool Congress pu·ongen ine MPTC-ni president parakataha.
Re·baenggipa July 18 tariko ong·atenggipa Presidential Election-o BJP-chi dilenggipa National Democratic Alliance (NDA)-ni candidate Droupadi Murmu baksa Sinha susana siengachim aro All India Trinamool Congress dolba Sinha-nan chakpaaniko on·engachim.
Re·anggipa antio Murmu-ni Shillong-ona re·baani somoio Trinamool Congress-ni MLA HM Shangpliang-ba dongpae NDA-o bakrimenggipa dolrang baksa bak ra·angpaahachim ine nikna man·a.
Iani bidingo talataniko on·angengon, “Ia tom·aniona dingtang dingtang dolni dilgiparangko aro MLA-rangkoba okamataha aro ia tom·anio anga MPTC-ni gita ong·gija an·tangsa re·ange bakko ra·epaaha. Murmu saksa Tribal me·chik ong·e a·songni dal·batsranggipa kamna susaenga aro anga una mande ra·aniko mesoknasa uni re·baanio dongpaaha,” ine Shangpliang parakataha.