SHILLONG: Songadam nokadamrango namroro silroroaniko ra·baan baksana manderang an·tangtangan kamrangko ka·e cha·na cholko on·enggipa Mahatma Gandhi National Rural Employment Guarantee Scheme-ko da·o a·dokni Census town-rangoba a·bachengataha aro iako Mongolbar salo, a·dokni Chief Minister Conrad K Sangma, a·dokni C&RD Minister Hamletson Dohling-ni dongpaanichi, Shillong songjinmani State Convention Centre-o a·bachengate on·angaha.
Ia MGNREGS-ko a·dokni census town-rangna a·bachengate on·anganio Chief Minister-ni parakatani gitade, ia census town-ni bidingo ru·uta bilsirangna jajaanirang ong·genchimoba, census town-rangko da·o dipet urban area aro cantonment area-ni parakkujani gimin ia census town-rangoba MGNREGS-ni kamrangko ka·na man·gen ine ma·mong sorkari talataniko on·ataha.
“Uni gimin manderangni ma·sisretaniko talatahani gimin anga dingtangmancha India sorkariko mittelpilna ska maina census town-rangko bak dakaniko name talbrejahani a·sel census town-rang, urban aro rural scheme-rangni namgnirangko man·jaha aro bang·a namroro silroroatani program-rangko man·rikjaha,” ine Chief Minister aganaha.
Meghalaya a·doko MGNREGS-ni kamrang namen chu·sokgipa ong·enga aro iani namgniko bang·bata manderangan man·na nanga ine janapatengon, MGNREGS-ni committee-rango 15 percent-ko me·chikrangna kange donchenggipa a·dokrangoni Meghalaya a·dokba skanggipa a·dok ong·a aro da·alo dingtang dingtang VEC-rango sak 2500-mangni gita me·chikrang, secretary-ni ong·e kamrangko ka·enga ine Chief Minister parakataha.
