CM’s Police Medal aro Disaster Response Medal-ko ia bilsioni a·bachengatgen

SHILLONG: Budbar salo, Meghalaya a·dokni Chief Minister Conrad K Sangma, a·dok gimikni superintendent of police (SP) aro commandant-rang baksa tom·aniko ong·atangenba, an·tangtangko on·kange kam ka·enggipa police-rangna dingtangmancha Chief Minister’s Police Medal aro Disaster Response Medal-ko ia bilsioni a·bachengatna tik ka·e donangaha.
Iako Budbar salo, a·dokni Chief Minister, a·dok gimikni SP aro commandant-rang baksa Shillong songjinmani Police Headquarter-o tom·e chanchirimangani ja·man, jinmana parakataha.
Ia tom·anio a·dok gimikni SP aro Commandant-rang baksa a·dokni Chief Minister aro gipin official-rang chanchirimangengon, a·dokni dingtang dingtang police station-rango computer-rang, IT-rang, crane aro ambulance-rangko on·dape police station-rangko namdapatna gitaba tik ka·angaha.
Je biaprangon ba a·jarango SP office ba uandakgipa office-rang dongkujachim, uandakgipa biaprango office-rangko on·na gitaba ia tom·anio sorkari ku·rachakaniko on·angaha.
A·dokni dam 76 police station-rangna gital garirangko aro computer-rangko on·na gitaba ia tom·anio a·dokni Chief Minister, ku·rachakaniko on·angaha.
“An·chingni police-rangan, manderang baksa kamrangko ka·rimgipa ong·a aro police-rang a·doko tom·tomaniko rakkinasan ong·aigija, dingtang dingtang nangchongmotgipa kamrangkoba ka·engani gimin sorkari, dingtangmancha police-rangna gisik on·e kamko ka·na nangnikenga,” ine Chief Minister parakataha.
Manderangna nambate dangdike on·na man·na gita sorkari, gari gora bang·gipa biaprangna aro a·sel ong·ronggipa biaprangna crane-rangko aro ambulance-rangko on·dapgen ineba Chief Minister parakataha.
Indake ong·engon, East Khasi Hills a·jao gari gorarangni re·ruraanirangko nambate nirok sandina man·na gita sorkari, bol 60 motorcycle-rangko police-rangna on·dapgen ineba ia tom·anio Chief Minister parakataha.
Ia tom·anio a·dokni Chief Secretary RV Suchiang, a·dokni DGP Dr LR Bishnoi aro gipin police officer-rangba dongpae bak ra·angaha.