SHILLONG: Meghalaya a·dokni dingtang dingtang deputy commissioner (DC) aro Civil SDO-rangni tom·bimonganiko Budbar salo, Shillong songjinmani State Convention Centre-o ong·atangaha aro ia tom·anio a·dokni Chief Minister Conrad Sangma-ba dongpae bakko ra·angengon, a·dok aro ma·mong sorkarini ra·gatgipa dingtang dingtang scheme aro program-rangko nambate chu·sokatchina DC aro Civil SDO-rangko didiangaha.
Ia tom·aniko ong·atani bidingo DC aro Civil SDO-rangna talate on·angengon, DC aro SDO-rangan a·jatangtangni aro biaptangtango songdongenggipa manderang baksa mikkanggrike kamko ka·giparang ong·ani gimin sorkarini kamrangko ka·anio an·tangtangni u·i-ma·sianirangko saksa sakgipinna sualgrikna aro saksa sakgipinni kamrangoniko skie ra·skana gita ia tom·aniko ong·ataha ine a·dokni Chief Minister Conrad Sangma parakataha.
“COVID sajinmani somoirango sorkari, dingtang dingtang a·jani deputy commissioner-rang baksa video conference-rangko ong·ate sorkarini kamrangni gimin chanchirimgenchimoba ian skanggipa changna apsan asonge chanchirimani ong·engani gimin ian dingtangmanchagipa tom·ani ong·enga,” ine Chief Minister aganaha.
Ia tom·anio lekka porako on·ani bidingo DC aro SDO-rang baksa apsan chanchirimangengon, a·doko donggipa sorkari LP, UP aro higher secondary skulrangko namdapatna gita gadang gadang dake kamko ka·enga ine Chief Minister aganenba, mikkangchi skulrangko namdapatna kam ka·anio rakbate kamrangko ka·china DC aro SDO-rangko didiangaha.
A·doko game ge·e cha·enggipa aro self help group (SHG)-rangko dakchakna gita a·dok sorkarini ra·gatgipa FOCUS program-ni gimin chanchirimangengon, da·o dipet ia program-ko ra·gatanichi game ge·e cha·enggipa aro songni nokni manderangna dingtanganiko ra·bana man·aha ine mikkangchiba ia program-ko chu·sokgipa ong·atchina a·dokni Chief Minister, DC aro SDO-rangko didiangaha.
Batanggimin somoirango mikkarang jimbee waanganichi a·dokni dingtang dingtang biaprango, chirang banne aro a·arang ruronge bang·a manderangan neng·nikanirangko chagrongna nangtokahani giminba ia tom·anio a·dokni Chief Minister, dingtang dingtang DC aro SDO-rang baksa chanchirimangaha aro duko ga·akenggipa manderangna chu·gimik nanga dakchakanirangko on·angkuchina gita didiangaha.
