TURA: Adita salrangna skang, Shillong songjinmao gimaanggipa me·chik sakgniko, West Garo Hills a·jani police-rang, West Garo Hills a·jani Kherapara joloniko man·pilaha.
Koborko on·ani gitade, ia me·chik sakgni, re·anggipa July 7 tariko Shillong songjinmao gimaahachim aro ia me·chikrangko police-rang Budbar salo, Kherapara joloniko man·pilaha.
Ia me·chikrangni gimaani bidingo police-rang, sing·sandina gita mande saksakoba rim·aha ine kobor on·aha.
Gimagipa me·chik sakgni aro police-rangni rim·gipa mande saksako ja·mano West Garo Hills a·jani police-rang, East Khasi Hills a·jani police-rangna pakwate on·ataha.
Indake ong·engon, jagittamna skang rim·gittanga man·gipa sakgipin me·chik bi·sakoba police-rang, West Garo Hills a·jani a·kawe joloniko jokatpilna man·aha ine kobor on·aha.
Koborko on·ani gitade, ia me·chik bi·sa, re·anggipa May jao nokoni gimaahachim aro police-rang, ru·uta somoirangna iani bidingo am·sandianirangko dakenba, ia me·chik bi·sako Phulbari jolo donggipa Gomaijora songoniko jokatna man·aha.
Ia me·chik bi·sako rim·gittanganio jak donggipa mande sakgnikoba police-rang rim·aha indiba ia me·chik bi·sako rim·gittanganio mongsonggipa ong·e jak donggipa Somsul Hoque-de da·o dipet police-rangoni kate dongkuenga ine police-rang u·iataha.
