SHILLONG: Meghalaya a·dokni SSA skulrango skigiparang jabongani dormaharangko man·tokkujaengon, ia dormaharangoni mitamko antignini gisepo on·chenggen ine a·dok sorkarini ku·rachakaniko skigiparang ra·chakna gita jechaktokaha.
Sukrobar salo, All Meghalaya SSA Teachers Association (AMSSATA) aro Meghalaya SSA Schools Association (MSSASA)-ni membor-rang, skigiparangni man·na nangkuenggipa dormaha aro gipin dabianirangni gimin Education department-ni Secretary R Rapthap aro Deputy State Project Director Andrew Warjri-ko gronge agangrikangahachim indiba sorkari official-rang baksa agangrikanio chu·sokgipa ong·jahani gimin an·tangtangni suk ong·gijaniko parakattokaha.
AMSSATA-ni membor-rang, Sukrobar sal dipet ari gri asonge jingjengatna a·bachengahaon, mikkangchiba apsan daken jingjengatangkuna tik ka·angaha aro MSSASA-ni gitaba, skigiparangni dabianirangko knachakjaengani gimin jingjengatanirangko dakna a·bachengataha.
Iani bidingo kobor ra·timgiparang baksa agangrikengon, skigiparangni dabianiko chu·sokatna gita sorkari antigni somoiko bi·ahani gimin uamang sorkari official-rang baksa agangrikaniko chu·ongnikjaha ine AMSSATA-ni president Las Marngar parakataha.
“Ma·mong sorkarioniko tangka paisarangko man·sogenchimoba a·dok sorkari chingna jagnini dormaharangkosan on·na man·aigen. Uni gimin chingna jabongani dormahako changsanon on·gen ine seachi ku·rachakanikosa nangenga,” ine Marngar parakataha.
Skigiparang, an·tangtangni man·gninan ramarango ong·kate jingjengatna nangenga aro ian namen kragijani ong·enga ineba Marngar parakataha.
Indake ong·engon, sorkarini aganchakaniko skigiparang chu·ongnikjahani gimin uamang July 18 tarik dipet ari gri jingjengataniko July 18 tarik dipet Additional Secretariat sambao dakna tik ka·aha ine MSSASA-ni chairman Aristotle Rymbai parakatskaaha.
Antignini gisepo mitam dormaharangko on·gen ine ku·rachakaniko SSA skigiparang ra·chakja
Date:
Share post: