SHILLONG: A·dok sorkarini kamrang aro tangka paisa jakkalanirang tik ong·ja ine matnangenba MDA sorkarini kosako central team-rangchi sandiataniko dakchina gita Meghalaya Pradesh Trinamool Youth Congress (MPTYC) mija Sukrobaro aganaha.
State executive-ni skanggipa tom·aniko dakani ja·mano koborni manderangna aganengon, a·dok sorkarini kam ka·ani tik ong·ja aro cha·boke cha·anian gapchipaia ine matnange aganan baksa, sorkarini kosako matnanggenchimode, Meghalaya Democratic Alliance (MDA)-o bakrimgiparang gimikan dolsa dolgipinko jaksi otgrike bon·ataia ine MPYTC state president Fernandes Dkhar aganaha.
Meghalayani dingtang dingtang project-rangko jako ra·ani tik ong·gijaniko sandie nina gita sandigipa dolko watatna Ma·mongna ia somoian nambatgipa ong·enga ineba Dkhar aganaha.
Unomitingo gisiko nanggipa aro chanchininggipa a·dokni chadamberangkoba uamangni party-o napchina Dkhar didianiko on·engon, a·dokni dingtang dingtang department-rangon chu·onggijanirang donga, aro chadamberangba uarangchiba neng·nikaniko man·enga, Dkhar aganaha.
Bang·a department-rango post-rang bang·en bangbang ong·e dongtokenga, uarango a·dok sorkari da·alonaba gapatkujaenga ine matnange aganengon, 1972 bilsio Meghalayako man·chengaoni Mukul Sangmani re·dilgipa sorkarian kamrangko bang·bate nakatatgipa ong·aia ineba MPYTC state president aganaha.
Ua indakeba aganaha je uamangni party, komibeoba sak 1,000 chadamberangko constituency ge·antion seokna chanchienga.
Uamangni party-de West Bengal-ni party-sa ine AITC-ni kosako changni chang chadrape aganenggipani bidingo sing·anina aganchakengon, Indian National Congress-ko saksa Bengali, Mumbai-o a·bachengataha ine aganaha.
Unbaksana mongsonggipa politics ong·ani gimin aroba chingni bilakbaengako nikani giminsa indakgipa kattarangko aganenga ineba Dkhar aganaha.
