TURA: Tura-o skanggipa changna National Eligibility Entrance Test (NEET) UG 2022 porikkako mijal Robibar salo Tura Don Bosco College centre-o ong·atangaha aro ia porikkao gimik, sak 344 chatro chatrirang serikna cholko man·aha.
Ia NEET porikkako National Testing Agency (NTA)-ni gita ra·aha aro ia porikkako ra·gipa City Coordinator-ni u·iatani gitade, ia porikkako darangoniba champengani grian name ong·atna gita man·aha.
“Porikkao segipa candidate-rang, somoi gitan Biometric Registration-ko matchote 1:30 bajiode porikka sechakgipa hall-o asongtokaha aro 2:00 bajiode OMR sheet-rangko candidate-rangna sualaha. Attamni 5:20 bajiode candidate-rang porikka matchote porikka sechakgipa hall-oni ong·kattokaha,” ine City Coordinator parakataha.
Ia porikkako name matchotatna man·ahani gimin ia Centre Superintendent Dr Madhusudhan Saha, Assistant Centre Superintendent Dr Yubraj Sharma aro Tura Don Bosco College-ni skigiparangkoba mittelpilataha.
Porikkako seengmiting somoio West Garo Hills a·jani Deputy Commissioner Swapnil Tembe aro Additional Superintendent of Police (ASP) Vikash Kumar-ba, porikka sechakgipa centre-ona re·ange porikka segipa candidate-rangko nieaha.
Indake ong·engon, Garo Hills-o skanggipa changna NEET porikkako ong·atahani gimin Tura Don Bosco College-ni Principal Fr Bivan Rodriques Mukhim-ba an·tangni kusi ong·aniko parakataha.
“Tura-o NEET porikkako sechakna centre-ko man·aniara Garo Hills-ni chatro chatrirangna dal·bea pattiani ong·chongmotaha. Pangnan Garo Hills-ni chatro chatrirang, NEET porikkako sena gita bang·bea tangka paisarangko koros ka·e Guwahati ba Shillong songjinmarangonasa re·angrongna nangachim indiba ia changode Garo Hills-ni chatro chatrirang, biaptangon donge ia porikkako serikna chol man·aha,” ine Fr Mukhim parakataha.
Mikkangchiba iandakgipa gipin porikkarangko Tura-o ong·atna gita Don Bosco College, NTA-na pilak nanga dakchakanirangko on·gen ineba college-ni Principal parakataha.
