A·songni gital President-ko seokna pu·onanio a·dokni sak 56 MLA-rang bak ra·a

SHILLONG: India a·songni gital President-ko seokna gita Sombar salo, a·song gimikon dilgiparang, pu·one bakko ra·angtokaha aro ia election-ko Meghalaya a·dokoba ong·atanio, a·dokni sak 56 MLA-rang, bakko ra·angtokaha.
Ia Presidential election-ko ong·atanio BJP-chi dilenggipa National Democratic Alliance (NDA)-oni Tribal me·chik Draupadi Murmu aro Opposition dolchipakni Yashwant Sinha susaengachim ine nikna man·a.
Meghalaya a·dokoba gital President-ko seokna gita pu·onaniko pring 10:00 bajioni Rilbong-o donggipa Meghalaya Legislative Assembly building-o ong·atangaha aro pu·onaniko attam 5:00 bajio matchotataha.
Gital President-ko seokna pu·ongipa a·dokni sak 56 MLA-rangoni, North Tura-ni NPP MLA Thomas A Sangma, pu·onchenggipa ong·aha aro KHNAM-ni MLA Adelbert Nongrum, bon·kamgipa ong·skaaha.
Ia pu·onanio Meghalaya a·dokni Rajya Sabha MP aro NPP-ni state president WR Kharlukhi-ba bakko ra·angaha.
Ia Presidential election-o NDA-ni candidate ong·e susaenggipa Draupadi Murmu-na NPP-chi dilenggipa MDA-ni bang·bata MLA-rangan chakpaanirangko on·enga aro Opposition candidate Yashwant Sinha-na All India Trinamool Congress (AITC)-ni MLA-rang chakpaaniko on·skaengachim.
MDA-o bakrimenggipa dolrangni NDA-ni candidate Draupadi Murmu-na chakpaaniko on·engani gimin talataniko on·angengon, skangonin India a·songo Tribal-rangko onchepe ra·engani gimin da·o Tribal me·chikrangoni saksa a·songni President-ni kamna susaaniara Tribal-rangna namen rasong chaani somoi ong·enga ine a·dokni Chief Minister aro NPP-ni national president Conrad K Sangma parakataha.
“Ua (Draupadi Murmu) a·songni President-na seokako man·genchimode a·songo songdongenggipa Tribal-rangna dal·bea dingtanganiko ra·bana man·gnok aro ian ong·telna sienggipa ine chinga ma·sienga,” ine Sangma aganaha.
Uni pagipa PA Sangma sagiba President-ni kamko man·na sikgiparangoni saksa ong·ani gimin ia salko una on·kanggenma ine sing·on, ian namen mongsonggipa sal ong·enga ine Chief Minister parakataha.
A·songni gital President-ko seokna pu·onanirangko July 21 tariko channe, seokako man·gipa gital President, July 25 tariko a·songni gital President ong·e ku·mikchetna sienga.