TURA: Meghalaya sorkarini a·bachengatgipa Aspire Meghalaya-ni program-ko Mongolbar salo Tura-o ong·atangaha aro ia program-ko ong·atanio a·dokni Chief Minister Conrad K Sangma, mongsonggipa sokgipa ong·e bakko ra·angaha.
Ia Aspire Meghalaya program-ara, chadamberangna a·gilsakni seng·ani baksana chadamberangni changa sapanirangko sandie namdapatna miksonge ra·gatgipa program ong·a aro ia Aspire Meghalaya 2.0.-ko chalaina gita Meghalaya sorkarini ning·o donggipa Sports & Youth Affairs Department, chu·gimik tangka paisarangko dakchake on·enga. Ia program-ni ning·o Meghalaya Youth Survey 2022-chi sak 60,000-na baten chadamberangko bak ong·ate, sak 10,000-na baten chadamberangko dingtang dingtang kamrango namdapatna sorkari miksongenga.
West Garo Hills a·jao, Aspire Meghalaya program-ko Tura Government College, Garobadha-ni St Dominic Higher Secondary School, Tura Sacred Heart HS School, Tura Government HS School aro Dalu Higher Secondary School-rango chalaiengachim ine nikna man·a.
Ia program-ko ong·atanio a·dokni Chief Minister, Aspire Meghalaya-ni chatro chatrirangna aganprakengon, a·gilsakni seng·aniko ra·anio, an·tangtangni changa sapanirangkoba mesoke, janggi tanganio dingtanganiko ra·bachina didiangaha.
Iandakgipa program-rangko ra·gatanichi Meghalaya sorkari, mikkangchiba chadamberangni changa sapanirangko mesokna cholrangko on·angkugen ineba Chief Minister parakataha.
