TURA: North Eastern Hill University (NEHU) Tura campus-na pro vice chancellor-ko songe on·an baksana ia campus-na dingtang dingtang nanganirangko chu·sokatchina NGO-rang dabitokengon, uamangni dabianirangko nangani kri chu·sokate on·na gita NEHU-ni Vice Chancellor ku·rachakaniko on·angaha.
NEHU Tura campus-ni dingtang dingtang nanganirangko chu·sokate on·jaengani gimin batanggimin somoirangonin Zikku Balgra N Marak-chi dilenggipa GSU, GSMC aro uandakgipa dingtang dingtang dolrangni nangrime bikotskagipa All Garo Hills Joint Action Committee (AGHJAC), NEHU Tura campus-o jingjengatanirangko dakengachim ine nikna man·a.
Indake ong·engon, jingjengatenggipa dolni dilgiparang Sombar salo, NEHU-ni Vice Chancellor Prof Prabha Shankar Shukla-ko gronge uamangni dabienggipa kamrangni gimin agangrikangaha aro ua uamangni dabianirangko nangani kri chu·sokate on·na kam ka·engaha ine ku·rachakaniko on·angaha.
“NEHU Tura campus-na pro vice chancellor-ko songe on·china chingni dabienggipani gimin janapangengon, Tura campus-na da·o changgipin Parliament session-o dongimin niamrango pangchake gital pro vice chancellor-ko songe on·gnok ine chingna Shukla aganangaha. Tura campus-ni da·o ong·enggipa campus-in-charge-ko chingni jegalenggipani giminba ua konta 48-ni gisepon gital in-charge-ko songe on·skana ku·rachakaniko on·angaha,” ine GSU-CEC-ni president Zikku Balgra parakataha.
GSU president-ni parakatani gitade, dingtang dingtang kamrango kam ka·giparangko gapatchina dabienggipani giminba advertisement-rangko ia bilsini February jaon on·manaha aro bakan porikka aro interview-rangko ra·gnok ine NEHU-ni Vice Chancellor, uamangna talataniko on·angaha.
NEHU-ni deputy registrar aro assistant registrar-ko songani giminba kamrangko niengaha ine NEHU-ni Vice Chancellor, NGO-rangna ku·rachakaniko on·angaha.
