TURA: Home Affairs Ministry-ni a·song gimiko a·bachengatgipa ‘Tree Plantation Drive-2022’-ni bak gita re·anggipa Sombar salo, Tura-o donggipa 120 Battalion CRPF dolni gitaba Tura-ni Inter State Bus Terminus (ISBT) aro East Garo Hills a·jani Williamnagar-o bol chararangko ge·angaha.
Bol ge·aniko 120 Bn CRPF-ni Commandant Parmod Kumar Singh dakdilangaha aro bol ge·anio 120 Bn CRPF-ni official-rang aro sipairang bakko ra·angtokaha.
Ia salo dingtang dingtang bolrang, jekai Ashok, Jamun, Kahtal, Te·gatchu, Amrud, Gulmohar, Balsam, Tejpatta, Dalchini, Agar, Paikas aro uandakgipa bolrangko CRPF dolni sipairang ge·angaha.
Re·anggipa July-ni 9 tarikoba ia apsan 120 Bn CRPF dolni sipairangan pang 2000 bol chararangko, dingtang dingtang biaprangoba ge·angaha ine kobor on·aha.
“Bolrangko ge·anichi an·ching an·chingni dongchakenggipa a·gilsakko chel·chakan baksana an·tangtangni janggirangkoba naljoke rakkina dakchakani ong·enga. Chinga CRPF dolni gita chiring chibisikrangko ripinganichi, rongtal an·talatanirangko dakanichi aro plastic grigipa a·songko ong·atna krenganichi a·gilsakko tangseke rakkina pangnan jotton ka·enga,” ine 120 Bn CRPF-ni Commandant Pramod Kumar Singh parakataha.
