SHILLONG: Meghalaya a·dokni Emergency Management & Research Institute (EMRI)-o kam ka·giparangni dabianirangko sorkari knachakjaengani gimin Meghalaya EMRI Workers Union (MEMRIWU)-ni membor-rang, Sombar attam 4:00 baji dipet kamtangtangko ka·gija jingjengatna a·bachengaha.
Meghalaya a·doko 108 emergency service-ko chalaienggipa GVK-ni contract-ko bon·atchina gita EMRI-o kam ka·giparang, dabienba konta 72 somoiko sorkarina on·angahachim indiba ia konta 72-ni gisepo sorkari maming ja·kurangko de·jahani gimin MEMRIWU-ni membor-rang, kamtangtangko dontonge jingjengatna a·bachengataha.
MEMRIWU-ni adviser Roypar Kharraswai-ni parakatani gitade, uamang National Health Mission-ni Mission Director Ram Kumar-ko grongenba, GVK-EMRI-ni contract-ko bon·atchina dabienggipani bidingo agangrikangahachim indiba ua uamangni dabienggipani bidingo maming ku·rachakanirangko on·na man·jaha aro a·dokni Health Minister James PK Sangma-ni gipin biapona re·ange sokbapilaniko sengkuchina gitasa aganataiahachim.
Kharraswai-ni aganani gitade, GVK-EMRI-ni contract, re·anggipa 2021 bilsini March 31 tariko bon·ani ja·manba uamang GVK-ni contract-ko ra·dodapjachina dabie jingjengatangahachim.
“GVK-na ra·dodapgipa contract, 2022 bilsini March 31 tarikon bon·ahachim aro uni ja·man sorkari, jagittamna somoi ra·daptaigipaba June 30 tarikon bon·ahachim. Iani ja·manoba sorkari maming ja·kurangko de·jaha,” ine MEMRIWU-ni advisor parakataha.
GVK-EMRI-ni contract-ko bon·ate, 108 emergency service-ko a·dok sorkari jako ra·jaskal uamang jingjengataniko dontongjawa ineba Kharraswai parakataha.
Kam ka·giparangni jingjengatanichi a·dokni manderang neng·nikanirangko chagrongna nanggenchimoba a·dok sorkari aro health minister-an daiko ra·na nanggen ineba ua parakataha.
