TURA: Mongolbar salo, a·dokni Chief Minister Conrad Sangma, Jackfruit Mela 2022-ko Tura-ni Dakopgre-o donggipa SMELC building-o do·ga oe on·angaha.
Ia Jackfruit Mela-ko a·bachengatanio a·dokni Chief Minister, Special Assistance to Tribal-Sub-Scheme-ni ning·o bol 5 power tiller ba kubotarangkoba game ge·e cha·giparangna pakwate on·angan baksana Garo Hills-na power tiller-rangko suale on·ani scheme-koba a·bachengate on·angjolaha.
Ia Jackfruit Mela-ko a·bachengate on·angani somoio a·dokni Chief Minister Conrad Sangma, program-o bak ra·giparangna aganprakangengon, Garo Hills-o te·brongko altuaen man·engani gimin a·dok sorkari, game ge·e cha·enggipa manderangni janggi tangani gadangko tang·doatna gita Jackfruit Mission-ko 2018 bilsini July jao a·bachengataha aro ia Mission-ko a·bachengatanichi jolni manderang, te·brongoniko ma·manti cha·ani bosturangko tarie bang·a namgnirangko man·tokengaha ine parakangaha.
Te·brongko ge·anichi gong kror 400-mangko bilsio man·engani gimin te·brongko name ge·genchimode ian manderangni janggi tanganio bang·a namgnirangko ra·bana dakchakani ong·gen ineba ua aganaha.
A·gilsakni gipin biaprango manderang bang·batan te·brongko sanditokenga ine janapatengon, a·dok sorkarini ra·gatgipa jackfruit mission aro Horticulture department-ni on·enggipa dakchakanirangko ra·e an·tangtangni man·dapanirangko bariatchina Chief Minister, Garo Hills-o game ge·e cha·giparangko didiangaha.
A·dok sorkarini ra·gatgipa FOCUS program-ni gimin janapangengon, ia program-o ra·gatanichi a·dok gimikni lak 4.5 game ge·e cha·giparang namgnirangko man·gen aro lak 2.5-mangni gitade ia scheme-ni namgnirangko man·engaha ine Chief Minister parakataha.
