TURA: Meghalaya a·dokni SSA skulrango skigiparang, batanggimin jabongani dormaharangko man·kujaengani gimin sorkarini kosako jegale jingjengatanirangko dakengon, Budbar salo All India Trinamool Congress (AITC)-ni chadambe dol, uamangni dilgipa Richard Marak-ni dilanichi, jingjengatenggipa SSA skigiparangna chakpaaniko parakeaha aro skigiparangni man·na nangkuenggipa dormaharangko ta·raken on·china a·dok sorkario dabiangaha.

SSA skulrango skigiparang, an·tangtangni man·na nangkuenggipa dormaharangko on·china aro gipin dabianirangko dake, re·anggipa Sombar salonin Shillong-o aro Tura-oba jingjengatanirangko dakengachim indiba skigiparangna a·dok sorkari, maming ku·rachakanirangko on·kujaengani gimin skigiparang, asonge jingjengataniko dontongkujaengachim.

Skigiparangna chakpaaniko parakatengon, “Chinga da·alo jingjengatenggipa skigiparang baksa kalimpaaniko mesokna re·baaha aro Tura-osan ong·aigija Shillong-o uamang maikai jingjengatengachim chinga pilakkon nikenga. Skigiparangni namgnina sorkari ta·raken uamangni dabianirangko chu·sokatna nanga aro iako ta·raken chu·sokatchina chinga dabienga,” ine AITC chadambe dolni dilgipa Richard Marak parakataha.

SSA skulrango skigiparang, re·anggipa February jaonin jabongani dormaharangko man·kujaengani gimin ia dormaharangko changsanon on·china gita dabitokengachim ine nikna man·a.

Meghalaya SSA Schools Association (MSSASA)-ni president Aristotle Rymbai-ni parakatani gitade, Sombar salo uamang, Education department-ni Additional Secretary DP Wahlang-ko gronge, skigiparangni dabienggipani bidingo agangrikangahachim indiba uni ku·rachakaniko chu·ongnikjae skigiparang, asonge jingjengatangkuna tik ka·e donangahachim.