TURA: Manderangni jilla kaanirang, chong·motan wak aro matchurangna al tariani karkana, jekon M/s Feed Mill ine biming donahachim, ia karkanako Budbar salo, a·dokni Chief Minister Conrad Sangma-ni jakchi Selsella Block-ni ning·o donggipa Haripur songo kulie on·angaha.
Ia al tariani karkana ba Feed Mill-ko a·kawe jolrango wak, matchu jilenggipa manderangna chu·onga gita alrangko on·na man·na gita a·dok sorkarini ra·gatgipa Piggery Mission-ni ning·o kuliaha aro ia karkanako IFAD-ni MLAMP Project aro Meghalaya sorkarini ning·o MBMA-ni kulie on·gipa Haripur IVCS Ltd jako ra·aha.
Ia karkanako kulina gita Meghalaya sorkarini Piggery Mission-ni ning·o gong lak 19.34 tangkarangko koros ka·aha aro iana ia mill-ko jako ra·e chalaienggipa dolba gong lak 21-ko koros ka·aha ine kobor on·aha.
Ia karkanao wak-matchurangna alko tarina gita ma·manti bosturangko jakkalna nanga aro ia karkanao kontasani gisepon komibeoba kg 1000 alrangko tarina man·a ineba kobor on·aha.
Ia Feed Mill-ko kulie on·angani somoio Rajabala-ni MLA Abdus Saleh, Selsella-ni MLA Ferlin CA Sangma, Phulbari-ni MLA SG Esmatur Mominin aro dingtang dingtang sorkari official-rangba dongpae bak ra·angaha.