TURA: Da·o dipet Meghalaya a·dokni Printing & Stationery Directorate-o Foreman kamni mandekosa promotion on·e ba kam ra·doange Director-ni kamkoba ka·atengani a·sel department-ni kamrangko name ka·na man·jaenga ine Government Branch Press Industrial Employees Association (GBPIEA) parakatenba, Director-ni kamnade IAS officer-rangonikosa seokchina gita sorkariko didiattaiaha.
Iani bidingo association-ni dilgiparang, re·anggipa 2020 bilsini December 1 tarikon a·dokni Chief Minister-na memorandum-ko on·atahachim indiba da·alonan iani bidingo maming aganchakanirangko man·kujaengani gimin changsataie association-ni dilgiparang, a·dokni Chief Minister-na gisik ra·atpilaniko on·angtaiaha.
GBPIEA-ni parakatani gitade, Printing & Stationery Directorate-o LPT Diploma donggipa manderangan Foreman-ni kamna dorgastoko galna man·enga indiba ia apsan Foreman-kon ja·mano assistant director-ona kam ra·doatchenge, deputy director, joint director aro ia department-ni chubatgipa director-ni kamnaba ra·doatrongengachim.
“Printing & Stationery Directorate-o Industrial, Ministerial aro Stationery section-rang gnang aro Foreman-ni kamde Industrial section-osa ong·na nangaiachim. Indiba ia apsan Foreman-kon Director-ni kamona ra·doatahaode ua kamrangko name ma·sipajaoba chubatgipa gadango ong·e ia pilak section-rangkon nirokna nangskaengaha,” ine association parakatenba, ia department-o Foreman-ko Director-ona kam ra·doatani bewalko gale, director-ni kamna IAS officer-ko songchina, sorkariko didiataha.
Foreman-ko director-ni kamona ra·doatengani a·selan pension aro GPF-rangko okani, kam ka·giparangko gadang ra·doani, nangchongmotgipa chittirangko on·ani aro uandakgipa dingtang dingtang kamrangko somoi gita ka·na man·jaenga ineba GBPIEA parakataha.
“Gipin department-rangode LDA-ni kamnaba manderangko seokani ja·man Meghalaya Administrative Training Institute (MATI)-o nanga gita training-ko on·chengesa kamo rakkiengani gimin sorkarina nambate kamrangko ka·na man·enga indiba Printing & Stationery Directorate-ode Foreman-kon maming training gri Director-ni kamnaba ra·doatengani a·sel kamrangko name ka·na man·jaenga,” ineba GBPIEA parakataha.
