SHILLONG: Meghalaya a·dokni Samagra Shiksha Abhiyan (SSA) skulrango skigiparang, re·anggipa February jaonin jabongani dormaharangko man·tokkujaengani gimin jingjengatanirangko daktokengon, skigiparangni dormaharangko on·na man·na gita SSA-ni tangka paisarangko ta·raken Meghalaya a·dokna watatchina gita didie, Bristibar salo Opposition dolni Chief Whip George B Lyngdoh, Union Education Minister Dharmendra Pradhan-na chitti sedoataha.
SSA skigiparangna jabongani dormaharangko changsano on·china dabianiko aro gipin dabianirangko knachakjaengani gimin skigiparang, re·anggipa Sombar salonin ari gri jingjengatanirangko daktokengachim ine nikna man·a.
Indake ong·engon, ma·mong sorkarionin tangka paisarangko watatkujaengani a·selsa skigiparangni dormaharangko chu·gimik on·na man·kujaenga ine adita salrangna skang a·dok sorkarini agangipa kattarango pangchake, Meghalaya a·dokna SSA-ni tangka paisarangko ta·raken watatchina gita Opposition dolni Chief Whip, Union Education Minister-ko didiataha.
“Songbadrango Meghalaya sorkarini parakgipa kattarangko janapani gitade, ma·mong sorkarini Education Ministry, tangka paisarangko watatkujaengani a·selsa Meghalaya a·doko SSA skigiparang, an·tangtangni man·na nangkuenggipa dormaharangko man·jae neng·nikanirangko chagrongna nangtokenga. SSA-ni tangka paisarangko maini gimin Education Ministry, Meghalaya a·dokna watatjaenga, anga ma·sina sikenga?” ine Union Education Minister-na sedoatgipa chittio Lyngdoh sing·doataha.
SSA skulrango skigiparangna jabongani dormaharangko on·kujaengani a·sel a·doko 20,000-na baten nokdangrang neng·nikanirangko chagrongna nangtokengaha ineba Lyngdoh parakataha.
“Dormahako somoi gita man·aniara mandeni bilan ong·a. An·ching manderangni man·gnirangko on·gijade maming dakeba kam ka·atna man·ja. Ma·mong sorkarini a·selsa skigiparang dormahako man·tokkujaenga ong·ode SSA-ni tangka paisarangko ta·raken Meghalaya a·dokna watatchina anga mol·molenga,” ine Union Education Minister Dharmendra Pradhan-na seatgipa chittio Opposition dolni Chief Whip parakataha.
Adita salrangna skangsan, Meghalaya SSA Schools Association (MSSASA)-ni Education official-rangko gronge agangrikani somoio, ma·mong sorkarionin tangka paisarangko watatkujaengani a·sel skigiparangna dormaharangko chu·gimik on·na man·kujaenga ine parakatahachim.