TURA: South Garo Hills a·jani Dambuk Aga Model LP skulo, 2020 bilsionin skigipa dongjaengani a·sel skulo poraienggipa bi·sarang, bilsi gittam ong·pile lekka pora gri ong·e dongna nangenga ine ia skulni gitcham skigiparang parakataha.
Kamoni neng·takanggimin skigiparangni parakatani gitade, ia skulara South Garo Hills a·jani Siju-Rongara constituency-ni ning·o donggipa skul ong·achim aro uamangni ia skulo kam ka·e neng·takangaonin ia skulo skigipa dongkujaengachim.
“Skangode ia skulo contractual skigiparangko kamo rakkirongachim indiba contract-ko gital daktaikujaonin ia skulo class-rangko ra·a dongjahachim. Skulo skigiparangko rakkijaengani a·selan skulo poraienggipa bi·sarang bilsi gittam ong·pile lekka pora gri ong·tokna nangengaha,” ine ia skulni gitcham skigipa aro skulni president parakataha.
Ia songni bi·sarangna a·gilsakni seng·aniko on·na man·na gita ia skulna komibeoba skigipa sakgittamko on·china gitaba ua didiataha.
Koborko on·ani gitade, skangde ia skulo sak 130 batpilen chatro chatrirang poraitokachim indiba 2020 bilsi dipetan ia skulna skigiparangko rakkijahani a·sel skulo admission ra·giparang sak 80-mangona tang·onangaha.
Ia skul nokni obostaba da·o namsrangjaengaha aro ta·raken taripile on·na nangengaha ineba ia skulni gitcham skigiparang parakataha.
Ia skulni gimin sing·sandiaton, 2020 bilsionin a·dok sorkari, contractual skigiparangni kamrangko bon·atahani a·sel ia skulo skigiparang dongjaha ine South Garo Hills a·jani SDSEO parakataha.
Sorkarini iandakgipa ja·kuko de·ahani a·sel gipin skulrangoba apsan daken skigiparang dongjae neng·nikanirangko chagrongna nangtokenga ineba Education official parakataha.
