TURA: Tura jillani ramarang apchonbean baksana ramarang a·kolrara dakani a·selan bang·a changon ramarango a·sel ong·anirangko aro garirangni apchangket ong·anirangko nikna man·enga ine Tura Walbakgre-ni mande saksa parakatenba, Tura jillani ramarangko apaldapatchina aro ramarangko nambate tarichina a·dokni Chief Minister Conrad Sangma-ko didiataha.
Tura Walbakgre-oni Cherian Momin minggipa mande saksani Chief Minister-na sedoatgipa chittio parakatani gitade, Tura jillani mongsonggipa biaprang, jekai Rongkhon, Chandmary, Ringrey, Hawakhana, Tura Bazar, Nakam Bazar, Araimile aro uandakgipa biaprango ramarang apchondugaani a·selan salni bakrango garirangni apchangket ong·anirangko nikna man·rongengachim.
“Tura jillara Garo Hills gimikni mongsonggipa biap ong·e, jillani ramarangko apalbatatgenchimode aro name tarigenchimode, bading chiwalanio tang·dopagipa biap ong·genchim. Tura jillani bang·bata ramarangkon contractor-rang, chu·gimik apalate tarijani a·selan ramarango a·sel ong·anirangko nikna man·enga. Haida, ia ramarangko tarigipa contractor-rang gisiko nange tarijahakon,” ine Momin parakataha.
Kamrangko ka·anio tangka paisarangko jakkalsretani, kamrangko name nirokjani aro garirango nangana bate bostu aro manderangko salengani a·selba Tura jillani ramarangko namdapatna man·jaengakon ine janapatengon, nosto ong·gipa ramarangko ta·raken taripile on·na man·na gita re·rurae nirokgipa dolrangko donna nangenga ine Momin parakataha.
Gari gorarangko salanio niam pe·giparangoniko bang·e dai ra·engani gimin janapatengon, ramarangko district administration namdapatna man·skajaenga ine Momin, suk ong·gijaniko parakataha.
