TURA: Garo Hills-ni a·kawe jolrango aro mongsongbate Chibinang jolrango, gipin biaprangoni re·napbaenggipa manderang, niam gri bading chiwale cha·tokenga ine Chibinang jolo donggipa dingtang dingtang dolrangni nangrime bikotgipa Joint Action Committee (JAC) parakatenba, ia jolrango niam gri bading chiwale cha·enggiparangko bilakbate nirok sandichina gita Garo Hills Autonomous District Council (GHADC)-ni Chief Executive Membor (CEM)-ko didiataha.
Chibinang jolo donggipa dingtang dingtang dolrangni nangrime bikotgipa JAC-ni parakatani gitade, ia jolrangona dingtang dingtang biaprangoni aro mongsongbate Assam a·dokoni manderang re·napbaenba, GHADC-ni Trading for Non-Tribal (TNT) licence gri bading chiwalanirangko dake cha·tokenga aro iani a·sel joltangni manderangan bading chiwalanirangko dake cha·na man·tokjaengachim.
“Uni gimin iandake Assam aro dingtang dingtang biaprangoni Garo Hills-ona re·napbae niam gri bading chiwale cha·aniko mikrakbate nirok sandichina aro TNT licence-rangko check ka·jringchina chinga didienga,” ine GHADC-ni CEM-na sedoatgipa chittio JAC-ni dilgiparang parakataha.
Iandake gipin biaprangoni re·baenggipa manderang, songni nokni manderangna nokrangko aro ma·manti bosturangko on·e, manderangni bagan barirangko ra·sekna jotton ka·enga ineba JAC parakataha.
“Uni gimin mikkangchi joltangni manderang, an·tangtangan bading chiwalanirangko dake, namroro silrorona man·na gita gipin biaprangoni re·napbaenggipa manderangna rakgipa niamrangko ra·gate on·china chinga didienga,” ineba JAC-ni dilgiparang, GHADC-ni CEM-ko didiataha.
