TURA: Garo Hills gimikni MTET pass ka·gipa candidate-rang, adita salrangna skang, Tura-ni Dakopgre-o donggipa SMELC building-o tom·aniko ong·atangenba, an·tangtangni chagrongna nangenggipa dingtang dingtang neng·nikanirangni bidingo chanchirimangaha aro ia tom·anio dingtangmancha MTET pass ka·gipa candidate-rangni dolkoba songe donangjolaha.
MTET pass ka·gimin candidate-rangoniko Lower Primary aro Upper Primary skulrango da·onan rimnapkujaengani gimin sorkarioniko sing·sandie ra·na gita dingtangmancha ia dolko bikotaha ine u·iataha.
MTET pass ka·gimin candidate-rangko, da·o gital MTET porikkako ra·na skangan LP aro UP skulrango kamo ra·aniko ta·rakchina gita sorkariko didina gitaba MTET pass ka·gimin candidate-rang tik ka·e donangaha.
Ia MTET pass ka·gimin candidate-rangni dolko dilna gita seokako man·gipa manderangara, president-na Surjoron Hajong, vice president-na Jempil N Marak, general secretary-na Mendric D Sangma, joint secretary-na Nagabell D Sangma, treasurer-na Grikchi WG Momin aro accountant-na Likush D Marak ong·a.
