SHILLONG: People’s Democratic Front (PDF) dolni MLA sakgni, chong·motan NPP-chi dilenggipa MDA Cabinet-o minister ong·enggipa Hamletson Dohling aro Umsning constituency-ni MLA Jason Sawkmie Mawlong-ko July 22 tarikni gisepon show cause notice-na aganchakaniko on·china ge·etahaoba MLA sakgnian aganchakaniko on·jahani gimin re·baenggipa 2023 bilsini Assembly election-o uamang PDF-oni susaama susajawaha ine PDF-ni dilgiparang sing·doangaha.
PDF doloni koborko on·ani gitade, ia MLA sakgnian, PDF dolni tom·anirango bak ra·pajahani gimin July 22 tarikni gisepon talataniko on·china gita PDF dolni dilgiparang ge·etaniko on·ahachim indiba da·alona kingkingan MLA sakgni, maming aganchakanirangko on·jahani gimin re·baenggipa 2023 bilsini Assembly election-o uamang PDF doloni susaama susajawa, uko aganchakchina PDF-ni dilgiparang sing·doangaha.
Dohling aro Mawlong sakgnian, re·baenggipa election-o gipin political doloni susana miksongenga ine koborrangko man·soahani gimin MLA sakgnini kosako PDF dolni dilgiparang sing·doangaha ineba kobor on·timgiparang parakataha.
Iani bidingo sing·sandiaton, ua PDF dolni show cause notice on·gipani bidingo maming ma·sia dongjachim ine Dohling parakatskaaha.
“Da·o dipet anga PDF-ni chittiko man·soa dongkuja,” ine a·dokni Cabinet Minister aro Mylliem constituency-ni MLA Dohling parakataha.
PDF dolni tom·anirango bak ra·jaenga ine agananikoba Mylliem-ni PDF MLA jegalataha.
“Anga changsamangmangsan an·tangni nangchongmota kam dongani gimin PDF-ni tom·anio bak ra·pajahachim,” ine Dohling aganaha.
Iani bidingo Umsning-ni MLA-ko sing·sandina gita jotton ka·on man·skajahachim.
Iandakgipa obostarangni bidingo PDF-ni president Banteidor Lyngdoh-ba maming kobor dongja ine adita salrangna skangsan parakatahachim.
NPP-o napchina gita uko NPP-ni dilgiparang gronge agangrikahachim ineba Lyngdoh parakataha.
“Angko NPP-o napchina aganahachim indiba anga PDF-on dongkuna nangnikenga ine Chief Minister (Conrad Sangma) aro Deputy Chief Minister (Prestone Tynsong)-na aganaha,” ine PDF-ni president parakataha.
2023 bilsini Assembly election-na PDF-ni skanggipa candidate-rangko August jao parakatgen ineba Lyngdoh aganaha.
