TURA: Tura-ni Edenbari jolo donggipa Tura-ni BJP MDC Bernard N Marak-ni bagan, jekon manderang ‘Rimpu Bagan’ (RB) ine mingsingtokachim, ia biapko police-rangni chadrapeanina ua, a·dokni Chief Minister aro South Tura-ni MLA Conrad K Sangma-ko dos gale matnangataha.
Ia bagan-ko chadrapeanio police-rang, ua biapona rona re·anggipa manderangko man·chape gimik sak 73 manderangko aro churang baksana ma·manti bosturangkoba rim·na man·ahachim.
Ia biapko Tura-ni MDC, me·a me·chikrang ong·gija dake rochakna aro churang ringchakna gita on·engachim ine police-rang matnangenba, uni kosako Immoral Trafficking (Prevention) Act-ni dingtang dingtang niamrango pangchake mokordomakoba ka·ahachim.
Indake ong·engon, an·tangni baganko chadrapeanina Tura-ni MDC Bernard Marak, a·dokni Chief Minister-ko matnangatskaenba, ian uni private biapsa ong·ani gimin warrant gri chadrapeaniara niamni a·palo ong·aha ine parakatskaaha.
“An·tangtang an·senge roanina ja·delgimin mandeko noti dari dakgipa ine aganna man·ja aro iandake manderangko sokachakgipa biapko ‘brothel’ ba me·chik palchakram ine aganna man·ja. An·tangna pu·ongipa manderangni kosako iandake ja·ku de·aniara angni kosako Chief Minister-ni ja·ku de·anikosa mesokani ong·aha,” ine Marak parakataha.
Sukrobar walo uni baganko chadrapani baksa February jao ong·anggipa POCSO case-ko nangataniara namen meligrikgijani aro kragijani ong·a ineba A·chik National Volunteers Council (ANVC-B)-ni gitcham chairman parakataha.
“February jao ong·anggipa POCSO case-ko maini gimin angni baganko chadrapegipa baksa nangate, dos gri chadamberangko rim·na nangaha? Police-rang tarisamsoa gnangsa angni baganko chadrapeaha aro uni ja·man angni ma·gipani nokkoba chadrapeaha. Chief Minister angna kenengani gimin angni kosako iandake tol·e matnangenba angko rim·na jotton ka·enga,” ine Tura-ni BJP MDC parakataha.
Chief Minister-ni ge·etaniko man·esa maming warrant gri, uni baganko police-rang chadrapeaha ineba Marak parakataha.
“Angni baganko chadrapeanio deputy commissioner aro SP-ni dongpaaniko nike anga namen aiao inmanaha. Raid-ko dakengon pangnan Excise department-sa kamko jako ra·rongachim indiba angni baganko chadrapaniode pilak niamrangkon pe·aha aro angni nokrangko nisie galaha,” ine Marak parakataha.
Uni baganko chadrapeanio, uni poraina dakchake on·enggipa bi·sarangkoba police-rang, kragija dakaha ineba Tura-ni MDC matnangataha.
Tura-ni MDC Bernard Marak-ko Shillong-ni Sadar Police Station-o an·tangko bame on·echina gita West Garo Hills a·jani SP u·iatahachim indiba da·o dipet an·tangko police-rangna bame on·skakujaengachim.