SHILLONG: A·doko drug ba pekgipa ringanirangko jakkalani batrikrikengani gimin mongsongbate Shillong Madanriting jolo drug badinga ba jakkalanirangko bang·bate nikna man·engani gimin iako champengna gita Meghalaya DGP, Sonibar salo gipin police official-rang baksa tom·e agan-grikangaha aro tom·anio jolni manderangba bak ra·angtokaha.
Meghalaya Police, Sonibar salo Madanrting-o dong-gipa manderangna drug-ko jakkalanio songsalna mai-dakgipa duk-neng·nika-rangko ra·baa, aro iako mai-dake champengna man·-gen, iarangni gimin chan-chirimaniko dakna tom·a-niko ong·ataha.
Uandake tom·anio bakko ra·e aganprakatengon, Meghalaya DGP, Dr LR Bishnoi, indine aganaha, “a·doko drug jakkalaniko bon·atna ba champengna police dol sorkari baksa raken kam ka·enga, indiba chinga, jolni manderangni dakchakani ba chakpaani gride kamo chu·sokna gita amjawa, na·simangni dakchakaniko nanga. Mongsongbate Madanrting jolo drug jakkalaniko, badingako bang·bate nikna man·enga, ian namen jajrengani ong·a.
“An·ching apsan ong·e ja·ku ga·ja ong·ode mik-kangchi neng·nikanirang batrikrikgen, uno cham-pengna neng·nikbatgnok, mikkangchi janggi tangna-giparangna namgipa song-salko on·na rkaen apsan ong·e kam ka·na nanggen. An·chingni mikkangchi dedrang su·drang an·-chingko kema watjawa.
Angni kamko jako ra·oni da·ona kg 1.5 heroin-ko man·aha, saksa mandeko drug addict ong·atna ba drug jakkaljringgipa ong·atna 450 miligrams-kosan nangaia, indake police kg 1.5 heroin-ko ra·seke, bang·a chadamberangni janggiko naljokataha.
Una agreba kg 4000 ganja-ko ra·sekaha. Indake DGP, jolni manderangko saobarang Manipur ba gipin a·dokrang baksa melia dongako u·ia ong·ode, police-na kobor on·china mol·molataha.
DGP-ni parakatani git ade, bilsi 2019-o survey ka·ani gita, Meghalaya-o lak 2.5 drug jakkalgiparang donga aro da·ode drug jakkalgiparang lak 3-na badeangjok, ian a·dokni mande jelgiparangoni 30 percent ong·a. A·songo drug jakkalgiparang chu·gimikko niatgenchim-ode kror 7.5 chadamberang donga. Meghalaya police, a·doko drug jakkalaniko bon·atna raken jotton ka·enga, aro jemangan drug-ni gimin u·iataniko on·gen, uamangna bok-sisko on·gen ineba aganataha. East Khasi Hills SP, Sylvester Nongtnger-ba bakko ra·angaha.
