SHILLONG: Adita salrangna skang, Tura-o BJP-ni MDC Bernard Marak-ni baganko chadrape police-rang, churang aro gipin ma·manti bosturang baksana adita sak manderangko rim·ani ja·man All India Congress Committee (AICC) aro Trinamool Congress (TMC) dolrang, Bharatiya Janata Party (BJP)-ni kamko sing·doangtokaha.
Ia a·selni bidingo TMC-ni MP Sushmita Dev, BJP-ko matnangatengon, BJP-ni dilgiparang, an·tangtangko gipin dolrangoni dingtanga ine a·kangtokenga indiba iandakgipa kamrangara BJP-ko dilenggipa manderangni ong·sianiko mesokanisa ong·skaenga ine parakataha.
“Ia a·selara, BJP dolni bilna rikanio maming misilgijaniko mesokanisa ong·aha,” ine Dev aganaha.
District council election-o biming namgija man·gipa mandeko susana dakchake on·aha ineba TMC-ni MP, BJP dolko matnangataha. “Ia mandeara bi·sarangni aro me·chikrangni kosako ong·gija dakgipa mandesa ong·a indiba iandakgipa mandeko dilgipani kamna seokaniara BJP-ni maming gungri ong·aniko mesokani ong·aha,” ine Dev aganaha.
Apsan daken, AICC-ni general secretary Meghalaya in-charge Manish Chatrath-ba, BJP MDC-ni iandake ong·gija kamrangna an·tangni baganko jakkalahani gimin an·tangni aiao inmananiko parakataha.
“Meghalaya a·dokni MDA sorkario BJP dolba bak ong·paengani gimin iandakgipa obostao maikai manderangko aro uamangni nokdangrangko chel·chakgen, talate on·aniko dakna nangenga,” ine Chatrath aganaha.
Ia a·selni bidingo Meghalaya Pradesh Congress Committee (MPCC)-ni gitaba jegalatengon, BJP-ni state vice president Bernard N Marak-ni baganko police-rangni chadrapaniara, a·doko NPP-chi dilenggipa Meghalaya Democratic Alliance (MDA)-ni kosakgilgil kamko mesokanisan ong·engkua aro iani ning·o mai dakgipa kamrangan dongkuenggen ine parakataha.
“MDA sorkarini kosako a·bachengonin tangka paisa jakkalsretanina aro ma·manti ong·gija kamrangna matnangtokengon da·o iandakgipa kamrangba jinmani mikkango ong·kataha. Uni gimin, Marak-ni baganko police-rangni tanggitik chadrapeaniara ia sorkarini batanggimin bilsibongana ong·gija dakaniko cho·bilani gitaba ong·aha,” ine MPCC-ni vice president Ronnie V Lyngdoh parakataha.
Ia a·selni bidingo aganchakaniko on·china gita ua a·dokni Chief Minister aro Home Minister-koba dabiangaha.
A·doko iandakgipa kamrangni bidingo jakgitele inquiry-ko dakatchina gitaba MPCC dabiangaha.
