TURA: CBSE aro ICSE porikkani result-rangko parakanio ja·manchakrongani gimin GNM aro ANM course-rangna admission ra·ani somoiko ra·dodapatchina gita Zikku Balgra N Marak-chi dilenggipa Garo Students Union (GSU) Central Executive Committee (CEC) dabiangaha.
Iani bidingo Shillong-o donggipa Health Services-ni Director-na sedoatengon, state quota-ni ning·o GNM aro ANM course-na admission ra·ani bon·kamgipa tarikko July 29 attam 3:00 bajiona donsoaha aro da·o gipin skulrang baksana board porikkani result-rangko parakahaoba CBSE aro ICSE porikkani result-rangkode parakkujaengani gimin ian CBSE aro ICSE-ni chatro chatrirangnade cholko on·ja gita ong·enga ine GSU-CEC parakataha.
“Uni gimin pilak chatro chatrirangnan apsan cholko on·na man·na gita GNM aro ANM course-na admission ra·ani somoiko, CBSE aro ICSE porikkani result-rangko parakaona sengkuchina chinga mol·molenga,” ine GSU-CEC-ni dilgiparang parakataha.
