TURA: Adita salrangna skang, Tura-ni Edenbari jolo donggipa Tura-ni MDC aro BJP Meghalaya-ni state vice president Bernard N Marak-ni bagan, jekon ‘Rimpu Bagan’ ine mingsing minggamachim, ia baganko police-rangni chadrape, ia bagano ong·gija dakanirangko rim·a man·ani ja·man Bristibar saloba police-rang, ia apsan bagano donggipa nokonikon gopretna jakkalgipa bosturangko aro silchidarerangko man·taiaha.
Iani bidingo kobor setimgiparangna seachi parakatengon, Bristibar salo District Child Protection Unit aro Meghalaya Police-ni gita, jokatako man·gipa bi·sarangni ba·rarangko aro ki·taprangko ra·na ine Rimpu Bagan-ona re·angon, ia noko chonbegipa do·ga ge·sako nikaha aro ja·mano police-rang, ia do·gako kulidrae napangon, ia kuturio gopretna jakkalgipa gelatin stick pong 35, detonator ge 100, chri ge 4 aro bra pong 15-ko man·aha ine Police official-rang parakataha.
Police official-rangni u·iatani gitade, ia bosturangko sakkirangni dongpaanio police-rang rim·e ra·baaha aro ia silchidarerangko bakan kachariona ra·angna sienga.
Matnangako man·gipa Tura MDC Bernard Marak (Rimpu)-ni kosako police-rang, Explosive Substances Act 1908-ni ning·o case-ko segatdapna tik ka·aha ineba police official-rang parakataha.
Bernard Marak-ko Mongolbar salosan Uttar Pradesh a·dokni Hapur a·jaoniko police-rang rim·ahachim aro uko Bristibar salo Tura-ona rimbapilahachim.