NEW DELHI: Meghalaya a·dokni gitcham Congress sorkarini somoio dol 12-mangni gita bobil dolrang dongachim indiba a·doko bobil dake chakatgipa dolrangko bon·ate gitcham sorkari, a·doko tom·tomaniko ra·bapilna man·ahachim ine Bristibar salo, Opposition dolni dilgipa Mukul Sangma parakataha.
Meghalaya Pradesh Trinamool Congress (MPTC) aro Opposition dolni dilgipa Mukul Sangma-ni parakatani gitade, gitcham sorkarini somoio bobil dake chakatgipa dolrangni a·sel a·dok sorkari, dingtang dingtang ra·bianirangko chagrongna nangachim indiba ua somoio gitcham sorkari, dingtang dingtang cholrangchi bobil dake chakatgipa dolrangko bon·ate 2018 bilsini gisepon a·doko chu·gimik tom·tomaniko ra·bapilna man·ahachim.
“2018 bilsio gital sorkari jako ra·ani somoio a·doko chu·gimik tom·tomaniko man·pilahachim aro ua somoio bobil dake chakatgipa dolrang dongjahachim. Ua somoio chinga tom·tomani donggipa a·dokkosa gital sorkarina pakwate on·angahachim. Indiba ia gital sorkari kamrangko ka·anio chu·sokgipa ong·jae, da·o gital bobil dolrangko ong·kattataina aro so·sojengjeng ong·aniko ra·bana a·bachengtaiaha,” ine Sangma aganaha.
Meghalaya a·doko ong·gija kamrangni gimin aro tangka jakkalsretani gimin matnanganirang sokbaon, MDA sorkari aro a·dokni Chief Minister Conrad Sangma, pangnan ia kamrangko jegalronga ineba Dr Sangma parakataha.
“Tangka jakkalsretanirango Chief Minister Conrad Sangma-ba jak donga inede anga matnanga dongkuja,” ine ua talataniko on·angaha.
