TURA: East Garo Hills a·jani Nengmandalgre Community Fish Sanctuary-o gital boat house-ko Sukrobar salo, Williamnagar-ni MLA aro a·dok sorkarini Chief Whip Marcuise N Marak-ni jakchi oprake on·angaha.
Ia boat house-ko oprake on·angani somoio East Garo Hills a·jani Additional Deputy Commissioner (ADC) Tangchiring K Sangma, sakgipin ADC Albert G Momin, Fishery department-ni Superintendent HS Sangma, gipin officer-rang aro songni manderangba dongpae bakko ra·angaha.
Nengmandalgre Community Fish Sanctuary-o ia boat house-ko Fishery department-ni gita rike on·ani gimin Fishery Superintendent HS Sangma, jinmana talate on·angengon, ia boat house aro ringrangko man·bae on·na gita pilak nanga dakchakanirangko on·ahani gimin Williamnagar-ni MLA-ko mittelpilangaha.
Ia tom·anio Williamnagar-ni MLA Marcuise Marak, mongsonggipa sokgipa ong·e jinmana aganprakangengon, songni nokni namroro silroroanina ia Community Fish Sanctuary-ko nirok sandienggipa dolko aro songni manderangko mittelpilangenba, a·doko songdongenggipa manderangni namgnina MDA sorkari, mai dakgipa kamrangko ka·engachim, uarangni gimin jinmana talate on·angjolaha.
Ia tom·anio dongpae jinmana aganprakanggipa gipin manderangara, East Garo Hills a·jani ADC Tangchiring K Sangma, ADC Albert G Momin aro gipinrang ong·a.