SHILLONG: Meghalaya a·dokni gitcham home minister Robert Garnett Lyngdoh, Sukrobar pring 11:40 bajimango, Shillong songjinmani Nongrim Hills-o donggipa uni noko a·gilsakko watangaha. Ua bilsi 62 ong·ahachim.
A·gilsakko watanggipa Lyngdoh sagi, 1998 bilsioni 2008 bilsiona changgni joljol Laitumkhrah Assembly Constituency-ni MLA ong·angahachim aro ua Martin Luther Christian University (MLCU)-niba gitcham Vice Chancellor ong·achim.
Ru·utbea bilsirangna politics-ni kamrangko watani ja·man Lyngdoh sagi, re·anggipa bilsiosan Congress dolo nappiltaienba, politics-ni kamrango bak ra·piltaiahachim.
Uni Meghalaya a·doko home minister ong·engmiting somoirango ua a·doko bobil dake chakatanirangko bon·atna ku·rangko on·dilgipa ong·achim.
Uni siangani ja·man, dingtang dingtang dilgiparang, an·tangtangni kalimpaanirangko parakattokaha.
Lyngdoh-ni sianina a·dokni Chief Minister Conrad K Sangma-ba kalimpaaniko parakatengon, “A·dokni gitcham Home Minister RG Lyngdoh, saksa kengijagipa mande ong·e pilakan uko mande ra·tokbeachim. Ua saksa kusi ong·ronggipa aro manderangko ka·dingatna changgipa ong·e, uni gronggipa mande sakanti baksaan ua ripeng ong·achim. Uni sianiko knasoe anga namen ka·a be·aha. Uni nokdangna angni kalimpaaniko on·atenga,” ine parakataha.
