SHILLONG: BJP Meghalaya in charge, M Chuba Ao, party-ni vice president Bernard Marak-ko rim·ani gimin janapatengon, ‘ia gimikan politics-sa’ ine aganaha.
‘Maini gimin Bernard Marak-ni resort-kosan nisan ra·aha, Tura-o sakgipinrangniba baditan resort-rang donga. Resort-o kal·aka man·gipa bilsi chu·sokkugija me·chikni badi ka·ani gimin resort-ko am·sandiaha ine Tura SP aganaha, ian kakket ong·chongmotode maini gimin ia mamlako skangoni sandijaha maina police ia mamlako sandian jabonga senge dongaha.
Minggipin am·sandianiko dakmitingo maini gimin ge·samangmang media channel ‘Hub News’-san dongaia, gipin channel-rang maina dongja ine Ao, sing·ataha.
‘Changgnina sandianiko dakao skanggipao silchidarerangko man·jaha, gnigipaosa man·aha, iarangko knaon bang·a sing·anirang nakata.’
Chief Minister, ia mamlao agantalataniko on·na nanga, maina BJP aro NPP-ara bakrimgipa ong·a, ning·in ning·in maiba neng·nikarang donggenchimode NPP, party-na u·iatna nangachim ineba Ao aganaha.
‘Jeba ong·bo party, judicial system-o ka·donga, Bernard Marak, saksa RTI activist ong·a aro ua kakketko jinmani mikkangona ra·bana ku·rang on·gipa ong·a. Chingni partner ba bakrimgipa, chingko altue ra·enga, sorkario bakrimgipa ong·paani gimin tale agangrikanirang dongna nanga.”
Ao, adita sarlang skangsan Shillong-ona wenbao, BJP president Ernest Mawrie baksa agangrikaha, aro ia mamlao BJP president JP Nadda, Union Home Minister Amit Shah- uamang baksaba agangrikgen ine koborna u·iataha.
Indake ong·engon AL Hek-koba maming u·iata ba agangrika gri, cabinet-oniko ra·galani gimin suk ong·gijako Ao, parakaha.
