Bading chiwalani aro tourism-ni a·bako, nambatatna, CM, Thailand baksa bakrimchina agana

Bangkok, Thailand: Sonibar salni bako, Meghalaya-ni Chief Minister, Conrad K Sangma, India-ni skotong songjinma, Delhi-na bate, Bangkok aro South East Asia-o donggipa a·songrangan sepangbata, uni gimin bading chiwalani aro tourism-ni a·bako nambatatna kam ka·anirango, uamang baksa bakrime kam ka·na altubata ine aganangaha.
Indake, ia kattarangko ua, Bangkok Thailand-o ong·enggipa, 2nd North East India festival-o, aganangaha. Salgittam-na ong·atenggipa manianiko, doka dama, cha·ani ringani, North East-ni pagitcham magitchamrangni ganding chindingrangko mesoke, da·al salni bako matchotatgen.
Uni aganani gitade, North East India aro South East Asia-ni ningo donggipa a·songrang, a·doktang aro songtangtangni dakbewal aro gamrangko nambatatna gita nangrime kamrangko ka·na gita man·gen, maina ganding chindinga aro daka rikanirang, ua a·songrango donggipa baksa apsangrika.
”India aro Thailand-ni nangrime dongani bilsi 2000-rang ong·aha. Skanggipa, 3-gipa century, BC-o King Ashoka-ni cha·songo ong·a, maina Buddhism-ko, Thailand a·songona, India a·songsa ra·angchenggipa ong·a. Gegni a·songrangon, Buddhism-ko apsan daken ja·rika. Thailand baksa, India skang salrangonin, daka rikani aro dingtang dingtang kamrango nangrime dongenga,” ine ua aganangaha.
”North East-o donggipa pilak a·dokrangan, South East Asia-ni bang·a songjinmarangona sepanggipa ong·a. Sepanggrika baksa ganding chinding, cha·a ringani aro daka rikanirang, North East-o donggipa jatrangni dakbewal baksa apsangrikangani a·sel, a·doktangtangko nambatatna aro silroroatna gita dolgnian name ku·monge kamrangko ka·na gita man·gen,” ine South East Asia aro North East Asia-ni nambate kamrangko ka·ani gimin aganengon, ua indake aganangaha.
Indake, ”Act East Policy”-ko de·mittele agana baksa, ma·mong sorkari aro North East -o donggipa a·dok sorkarirangni kam ka·na skaniko aganjole, ua Prime Minister Narendra Modi, North East-o donggipa a·dokrangko nambatatna aro silroroatna kamrangko ka·na gita ka·donganirangko on·aha ine aganangaha. Uni aganani gitade, iarangni a·selan, North East-o donggipa a·dokrang, bading chiwalanirangko, South East Asia-o donggipa a·songrang baksa name dakna gita man·enga, ine ua agananaha.
”Anga bebe ra·a, manianiko ‘People to people exchange’ ine biming done manianichi, a·song gegnini apsangrikanirangko manderang agangrikna aro mesokgrikna gita man·gen. Anga chanchia, ia maniani manderangna cholko mesoke on·gipaba ong·gen. Unbaksa, jatsa jatni dakbewalrangoni mesokgrikanichi, manderang gitalgipa cholrangko janggi tangna gita ra·angna man·gen,” ine ua aganangaha.
Uni aganani gitade, Norh East-o donggipa gam, biap aro cholrangko, South East Asia-o donggipa a·songrangni investor-rangna mesokna gita nanga, jedakode uamang an·tangtangni bading chiwalanirangko bariata baksana, North East India aro South East Asia-ni bostu palgrikanirangko nambatatna kamrangkoba ka·gen.
”A·doktangtangko nambatatna gita, an·ching North East-o donggipa mande sakantian dingtangmanchagipa policy-rangko nangrime ra·bana gita nanggen,” ine Thailand-ni, chongipa FTA-rangko, a·songni ge 5 a·dokrango dakna miksonganiko agane, manderangna aganangaha.
”Batanggimin salrango, Hon’ble Union Finance Minister-ni parakataniko nigenchimode, ma·mong sorkari, USD 17.19 billion tangkarangchi, rel, rama aro sildorengrangko ramarangko, North East India-na nambate kamrangko ka·na gitasienga. A·song gegniko sepangbatatna aro nangrime kam ka·na gita, India-ni Act East Policy-ko, Thailand-ni Act West policy namdapate kam ka·anirangko dakaha,” ine ua aganangkuaha.

Get real time updates directly on your device, subscribe now.

Comments are closed.